Kơxê lơ 14/2, pôa Phạm Minh Chính, Ngế pro xiâm hnê ngăn tơnêi têa hiăng tơdah khu kăn Hô̆i đong mơdró kâ EU – ASEAN ƀă Khu tơrŭm mơdró kâ châu Âu a Việt Nam (EuroCham) vâ tơpui tơno ‘na mâu troăng hơlâ mơdêk tơrŭm cheăng kâ, tê mơdró ƀă ‘no liăn cheăng pơla Việt Nam ƀă EU. Klêi kơ’nâi tơmâng mâu rơkong tơpui tối, pôa Phạm Minh Chính, Ngế pro xiâm hnê ngăn tơnêi têa tối nhên Việt Nam đi đo ngăn nhuô̆m tơrŭm kong têa, tơrŭm cheăng ƀă Tơrŭm tung tâi tâng Việt Nam – EU xuân môi tiah tơrŭm ƀă mâu kong têa ki tơrŭm cheăng; đi đo môi tuăn mơdêk ƀă pro trâu hngế tâ nếo tơrŭm cheăng ƀă mâu kong têa tung la ngiâ ASEAN – EU.

Ngế pro xiâm hnê ngăn tơnêi têa pơkâ thế mâu khu ki ‘no liăn, khu mơdró kâ EU pơtối rơtế prôk ƀă Việt Nam tung tơbleăng 3 tơdroăng ki xiâm tung la ngiâ, mơdêk 3 ivá mơnhông ‘no liăn cheăng, tê kế tơmeăm ngi kong têa ê, roê xúa kế tơmeăm; tŏng kum tơdroăng ki rơhêng vâ mơnhông krá tơniăn tung mâu kơvâ cheăng môi tiah hơ’lêh kơxô̆, hơ’lêh ngiât, cheăng kâ, mơnhông hngêi trăng, troăng klông (tung mê ai hngêi trăng, troăng klông ki xiâm); hơ’lêh nếo tơdroăng tơmiât rơkê, hnê mâu ngế cheăng rơkê, bro hơ’lêh kơchơ tê mơdró, kế tơmeăm, troăng ki tê kế tơmeăm.