Kơxo lơ 31/1/2023, Khu xiâm ngăn ‘na tê mơdró hiăng pơkuâ, tơrŭm ƀă mâu Khu xiâm kơvâ cheăng, kong pơlê, Khu mâu kơvâ cheăng tơkŭm po “Hôp tơpui tơno tơdroăng mơdêk tê mơdró ƀă Khu xiâm ngăn tê mơdró Việt Nam a kong têa ê khế 1/2023’’. Kố cho hneăng hôp apoăng tung hơnăm 2023 dêi mâu rôh hôp tơpui tơdroăng “Hôp tơpui tơno mơdêk tê mơdró ƀă Khu ngăn tê mơdró Việt Nam a kong têa ê” châ Khu xiâm ngăn tê mơdró po hôp tiô hmâ rêm khế sap khế 7/2022.

Hneăng hôp hiăng tơ’mot lối 500 ngế kăn ing mâu kơ koan Xiâm ngăn tê mơdró, tâi tâng mâu mâu khu xiâm ngăn tê mơdró, Khu ngăn tê mơdró Việt Nam a kong têa ê, mâu Ƀơrô Mơhnhôk ‘na tê mơdró Việt Nam a kong têa ê, mâu Tíu xiâm pêi cheăng ngăn ‘na tê mơdró, Khu xiâm ngăn ‘na pêi chiâk ƀă mơnhông thôn pơlê, Khu kơvâ ngăn ‘na mâu tơmeăm khoăng troh veăng hôp.

A hneăng hôp, ngế pơkuâ kơvâ cheăng ngăn Tê mơdró pơkâ thế mâu Khu xiâm ngăn tê mơdró ƀă mâu kơ koan khu râ kơvâ cheăng ki tơdjâk troh pơtối pêi pro tro tâ nếo tơdroăng mơhnhôk tê mơdró, mơdêk tơdroăng tê tơmeăm ăm kong têa ê, rơtế ƀă mâu kong pơlê, khu tơrŭm cheăng ƀă khu mơdró rơtế pêi tro tŭm tơdroăng pơkâ cheăng dêi Chin phuh hiăng pơkâ ăm tung hơnăm 2023: “Môi tuăn pêi tro luât, pêi rơkê, pơ’lêh nếo, teăm tơdrêng ƀă hlối tơƀrê”.