Kơxê lơ 26/3, a pơlê kong kơdrâm Huế, kong pơlê Thừa Thiên Huế hiăng mơgêi Hâi phiu ro pơxiâm tăng cheăng pêi tơnêi têa dêi hok tro, sinh viên. A kố, Khu tơkŭm po hiăng diâp pri Roh tơ’noăng ‘’Hok tro, sinh viên ƀă troăng tơmiât pơxiâm tăng cheăng pêi’’ roh má V. Roh tơ’noăng hiăng châ tơdah 508 tơdroăng tơkêa bro ối tung 5 kơvâ: kơmăi kơmok, mơjiâng pro tơmeăm; pêi chiâk deăng, loăng pơlái kong kế, ká xi xŏng; hnê hriâm, ôm hyô, tê mơdró, liăn ngân; khăm pơlât, rak ngăn ivá , kŏng ngê̆ pro lĕm ƀă tê mơdró mơjiâng tơdjâk pơlê pơla.

80 tơdroăng tơkêa bro ki rơkê châ mot tung roh rah xo ƀă roh mơgêi dêi hneăng tơ’noăng. Khu tơkŭm po hiăng diâp 80 pri tiô 2 khu tơ’noăng hok tro ƀă sinh viên, tung mê 10 pri má Môi, 20 pri má Péa, 30 pri má Pái ƀă 20 pri Mơhnhôk.

Jâ Ngô Thị Minh, Ngế xiâm phŏ pơkuâ hnê hriâm ƀă Hnê mơjiâng tuăn ngôa rơkê pói vâ mâu hok tro, sinh viên pơtối păn dêi tơdroăng hâk vâ dêi tơná, pêi kêi đeăng mâu tơdroăng tơkêa bro, rĕng mơjiâng khu tê mơdró pơxiâm tăng cheăng pêi, kum pêi pro châ tơƀrê pơkâ mơnhông mơdêk cheăng kâ pơlê pơla hneăng hơnăm 2021 – 2025.