Kơxo lơ 14/12, a pơlê kong kơdrâm Đà Lạt, Khu pơtâng tối tơdroăng kal Tơnêi têa pơkuâ po, tơrŭm ƀă Khu pơkuâ hnê ngăn Đảng kong pơlê Lâm Đồng tơkŭm po Mơgêi Rôh tơ’noăng giảng viên lĭ luâ̆n chính trị rơkê hơnăm 2022. Veăng a rôh tơ’noăng ai 38 ngế châ kâ pri ki rơkê a rôh tơ’noăng râ kong pơlê, pơlê kong kân, cho mâu giảng viên ki rơkê má môi, teăng mâ ăm lối rơpâu ngế kăn ƀô̆, giảng viên dế pêi cheăng a mâu tíu xiâm hnê hriâm tơdroăng kal kí tung lâp tơnêi têa.

Tơpui a rôh pơxiâm po mơgêi, pôa Trần Thanh Lâm, kăn xiâm phŏ khu pơtâng tối tơdroăng kal Tơnêi têa tối nhên, rôh tơ’noăng kố cho vâ mơnhên tối ‘na ivá ki rơkê dêi mâu giảng viên ki hnê hnoăng cheăng dêi tơná tung tíu xiâm hnê tơdroăng kal kí râ tơring troh tơngi klêng. Tung tơdroăng mê, pơkâ mơ’no, pâ thế ƀă kơ koan ki ai hnoăng pơkuâ mâu troăng hơlâ pơkâ tơtro, pêi tơƀrê tung tơdroăng hơ’lêh túa cheăng ăm rế i kơhnâ, mơdêk ki hriăn rơkê plĕng tung hnê tơdroăng kal kí xuân môi tiah pêi pro châ tơdroăng rơhêng vâ dêi tơdroăng cheăng kăch măng tung hneăng ki nếo.