Klêi kơ’nâi 3 hâi pêi cheăng, a kơxê lơ 15/2, Vi ƀan pơkuâ Kuô̆k hô̆i hôp mơgêi roh hôp 20. Xông tơpui mơgêi, pôa Vương Đình Huệ, Kăn xiâm hnê ngăn Kuô̆k hô̆i tối ăm ‘nâi, a roh hôp kố, Vi ƀan pơkuâ Kuô̆k hô̆i hiăng tơpui ‘na mâu tơdroăng kân laga tơpui phá tơ-ê dêi pó dêi mâu tơdroăng tơkêa bro Luât hbrâ dêi xivil; Luât gâk kring hnoăng pơxúa mơngế rôe xúa (‘mâi rơnêu); Luât mơdró điê̆n tưh (‘mâi rơnêu).

3 tơdroăng tơkêa bro troh nôkố tŭm tơdroăng pêi kêi đeăng pâ rơkong tơpui Kăn teăng mâ Kuô̆k hô̆i pơkuâ. Vi ƀan pơkuâ Kuô̆k hô̆i hiăng têk kŏng tơbleăng ăm pêi pro Pơkâ hnê mơhno Pơkâ hneăng hôp Kuô̆k hô̆i ƀă Pơkâ ‘na hnoăng cheăng, hnoăng pơkuâ tơdroăng cheăng ƀă tơdroăng rah xo, khu tơrŭm cheăng dêi Khu chêh tôm xo rơkong. Ƀă mâu tơdroăng ki tơdjâk tơnêi tơníu pơkuâ tơnêi têa roh kố hiăng mơjiâng châ 1 pơlê kong kơdrâm, 2 kong krâm, 34 bêng, 11 pơlê kân ƀă ai ‘mâi rơnêu tơnêi tíu pơkuâ tơnêi têa râ cheăm ối tung 10 kong pơlê.

Kăn xiâm hnê ngăn Kuô̆k hô̆i tối nhên, kố cho troăng prôk ki kal vâ pêi kêi đeăng khu tơrŭm cheăng khu râ kăn pơkuâ ƀă pêi pro Pơkâ tơnêi têa ‘na tơdroăng mơnhông mơdêk tíu kơdrâm kuăn pơlê rêh ối.