Kơxo lơ 15/3 a Hà Nội, Đảng ủy Khô̆i mâu Kơ koan Tơnêi têa tơrŭm ƀă Hlá tơbeăng Kŏng san, Rơ’jíu Việt Nam, Hlá tơbeăng Kuăn pơlê, Rơ’jíu Um tơvi Việt Nam ƀă Thông tâ̆n xah Việt Nam tơkŭm po mơhnhôk Roh tơ’noăng tơpui ‘na kal kí pơlê pơla ‘na gâk kring xiâm kối troăng tơmiât pêi dêi Đảng hơnăm 2023 tung Đảng ƀô̆ Khô̆i mâu kơ koan Tơnêi têa.  

Pôa Nguyễn Văn Thể, Kăn pơkuâ hnê ngăn Đảng ŭy khô̆i mâu kơ koan Tơnêi têa tối nhên, Roh tơ’noăng cho roh hôp kal kí tâi tâng Đảng, tâi tâng kuăn pơlê, tâi tâng khu lêng rơtế gâk kring xiâm kối troăng tơmiât pêi dêi Đảng.

Xua mê, mâu Đảng ủy ối tung khu kal pêi pro nhên mâu pơkâ pêi, vâ mơjiâng môi tơdroăng pêi tung mâu Đảng ƀô̆ tơtro, châ tơƀrê. Tơdrêng amê pơkâ thế, mâu kơ koan kal pro tơ’lêi hlâu ăm mâu khu xiâm, đảng viên hriăn plĕng, ti tăng plĕng vâ mơjiâng mâu ƀai chêh ki hôm, chêh tối troăng hơlâ dêi Đảng ƀă Tơnêi têa pêi pro tung kơvâ cheăng a kơ koan, tíu cheăng djâ châ tơƀrê lĕm; xuân môi tiah veăng tơpui tối mâu tơdroăng ki ối pá, pơkâ mơ’no mâu pơkâ troăng rak tơniăn.

Ing mê vâ troh lâp lu tung tơdroăng rêh ối, xuân môi tiah tung tơdroăng pêi cheăng dêi tơná ƀă hnoăng cheăng gâk kring xiâm kối troăng tơmiât pêi dêi Đảng.