Rôh hôp mơnhên tối klêi kơ’nâi 20 hơnăm pêi pro Pơkâ kơxô̆ 23 ƀă mâu troăng hơlâ dêi Đảng ‘na tơrŭm tâi tâng hdroâng kuăn ngo hiăng châ tơƀrê hên. Măt trâ̆n Tơnêi têa ƀă mâu khu râ kuăn pơlê pơtối hơ’lêh nếo tơdroăng kal ƀă túa pêi pro, mơhnhôk hên hĭn kuăn pơlê veăng tung mâu tơdroăng tơ’noăng pâ nhuô̆m tơnêi têa; hbrâ veăng séa ngăn ƀă tơpui tối leăng; pêi pro tro hnoăng cheăng kông tơdjêp pơla Đảng, Tơnêi têa ƀă kuăn pơlê.

Laga, ivá rơdêi tơrŭm tâi tâng hdroâng mơngế ai drêng ‘nâ, ai tíu tá hâi châ tơmâng ngăn khât. Mâu kơxô̆ liăn, ki ai hlâu rơkê dêi kuăn pơlê tung mơjiâng ƀă rak vế Tơnêi têa tá hâi châ mơdêk tro. Tung pơla lâp plâi tơnêi ƀă tung kơpong tung la ngiâ ôh tá tơniăn ƀă xơpá vâ tối hdrối, mâu rơkong ki veăng tơpui tối a rôh hôp pơkâ mơ’no kal rĕng pơkâ nếo teăng ăm Pơkâ 23, vâ pơtối mơdêk ivá rơdêi tơrŭm tâi tâng hdroâng mơngế tung hneăng ki nếo nôkố. Mâu kăn xuân tối tiah kố, vâ mơjiâng khu tơrŭm tâi tâng hdroâng mơngế mê tơná Đảng athế krúa, rơdêi, athế djâ troăng ahdrối.