Nôkố tung lâp tơnêi têa ai lối 85 rơpâu Tôh rak vế gâk kring, tơniăn ƀă lối 276 rơpâu ngế cheăng. Klêi kơ’nâi 1 hơnăm tơbleăng Luât tơdroăng xôi gtâk kring a cheăm bêng đi đo châ rak krá, mâu ngế pro xôi pơtối hlo kơdroh; hên cheăm bêng tối tơdroăng ki tơklô̆m rơxế a troăng kơdroh hên, tơdroăng pro mâu tơdroăng ôh tá tro tung pơlê pơla châ mơdât; tơdroăng tâi tâng kuăn pơlê rak vế gâk kring Tơnêi têa rế hía rế mot trâu hngế ai pơxúa khât, veăng mơjiâng, ‘mâi mơnhông tơdroăng gâk kring kuăn pơlê rế hía rế  krá rơdêi ƀă hên ki ê.

Diâp mâu pơkâ khê̆n kơdeăn ăm mâu ngế ki kơhnâ rơkê a Rôh hôp, pôa Phạm Minh Chính, Ngế pro xiâm hnê ngăn tơnêi têa rơkâu ƀă tối rơdêi mâu tơdroăng veăng gum dêi mâu khu ki veăng gâk kring, tơniăn a mâu cheăm bêng-khu kố pơtối tơrŭm krá ƀă kuăn pơlê. Maluâ tiah mê, Ngế pro xiâm hnê ngăn tơnêi têa mơhno nhên, kơlo tŏng gum iâ; rơxế, kế tơmeăm xúa tung tŏng gum ối xơpá. Pôa pơkâ thế hriăn plĕng pơkâ mơ’no troăng hơlâ xoăng liăn Tơnêi têa vâ gum mâu kong pơlê ki xơpá, peăng ngo, kơpong hngế hngo, kơpong xơpá tung tơdroăng ‘no hrê liăn tŏng gum, roê mâu rơxế kơto ăm mâu khu ki veăng gâk kring, tơniăn a cheăm bêng.

Khu xiâm ngăn Kŏng an kal đi đo tơmâng ngăn hnê, hriâm mơdêk ki rơkê plĕng dêi luât, tơdroăng cheăng; pơtối séa ngăn, mơdêk rĕng tơdroăng ki hbrâ rơnáu tơmeăm xúa gum ăm khu ki veăng gâk kring vâ pêi châ tơdroăng rơhêng vâ pêi, tơdroăng cheăng pơkâ.