Lối môi măng tĭng klêi kơ’nâi roh rơxế container klâm a hngêi kuăn pơlê pro 3 ngế hlâ, kuăn pơlê rêh ối drô troăng kân Hồ Chí Minh a kơpong kơchơ 312, cheăm Dak Rla, tơring Dak Mil, kong pơlê Dak Nông, xuân tá hâi tâi ki xâu préa. Jâ Phạm Thị Ngọc Lan – môi ngế kuăn pơlê rêh ối tung kơpong tối ăm ‘nâi, troăng kân lĕm kố hiăng pro hên ngế vê rơxế tơngôu ôh tá bê tơmâng, kơtâu têi. Xua mê bu to lâi hơnăm hiăng hluâ, a kố hiăng ai 8 ngế hlâ, 6 ngế tro rong xua tơklâm rơxế.

‘’Á tê mơdró a kơchơ ton hơnăm kố, hlo kơpong kố hmâ ai tơklâm rơxế hên ‘nâng. Nôkố á pói khu cheăng kan sát rak ngăn troăng klông thăm séa ngăn kơpong rơ-iô kố; kơ koan cheăng kal rĕng ai troăng pêi pro rơxế kơdroh kơtâu têi, krâ camera pơxâu phâk kơ’nâi, vâ tơniăn ăm kuăn pơlê tê mơdró, rêh ối a kĭng troăng’’.

Pôa Lê Văn Hoàng - Kăn hnê ngăn Vi ƀan tơring Dak Mil, kong pơlê Dak Nông, tối, troăng kân Hồ Chí Minh tơkâ hluâ tơring ai 2 ‘’tíu ki hmâ trâm’’ ‘na tơklâm rơxế cho kơpong hluâ tíu xiâm cheăm Thuận An ƀă kơpong kơchơ 312 cheăm Dak Rla. Mâu tíu kố ai mâu roh tơklâm rơxế ki râ ó, pro hlâ hên ngế ƀă tơ’nhê hên rơxế, tro lŭp kân ‘na cheăng kâ. ‘Na tơdroăng xut tah mâu ‘’tíu hmâ trâm’’ tơklâm rơxế pro ôh tá tơniăn troăng klông kố, pôa Lê Văn Hoàng tối mơdêk pơtâng tối mơdêk hlê plĕng dêi kuăn pơlê veăng troăng klông cho tá hâi tŭm, mê kal rơnêu troăng klông.

‘’Tơring mơdêk pơtâng tối, mơdêk hlê plĕng kuăn pơlê pêi tiô kơtăng, ki rơhêng vâ tối cho mâu ngế vê rơxế ‘na ki kơtâu têi ƀă mâu pơkâ ki tơdjâk troh rak tơniăn troăng klông. Khu cheăng thế thăm séa ngăn pơkuâ, teăm tơdrêng châ hlo mâu tơdroăng pro xôi, pơxâu phâk kơtăng tiô pơkâ. Vâ mơdât tâi tâng tơdroăng, kal thế mơ’no liăn mơjiâng pro troăng klông. Pơtih môi tiah po rơdâ mâu troăng kân, pro  kế ki xoăng prôk troăng, thế pêi pro tơdâng tơ’mô hên troăng pêi’’.

Kong pơlê Dak Nông ai 3 troăng kân tơnêi têa prôk tơkâ hluâ cho 14, 14C, 28. Kơvâ cheăng kong pơlê mơnhên a mâu troăng kân tơnêi têa ƀă mâu troăng kân kong pơlê ối ai 18 ‘’tíu ki hmâ trâm tơklâm rơxế’’ ai hên mâu tơdroăng tơklâm drô troăng kân. Tung dế apoăng hơnăm kố, a Dak Nông ai 57 roh tơklâm rơxế, pro hlâ 43 ngế, tro rong 53 ngế. Tâng pơchông ƀă roh kố hơnăm hdrối, tơklâm rơxế kơdroh 12 roh, kơdroh 2 ngế hlâ, laga tâk 18 ngế tro rong. Thươ̆ng tă Văn Ngọc Lập, Kăn phŏ pro kăn pơkuâ Kan sát rak tơniăn troăng klông ƀă rơxế kơtâu kŏng an kong pơlê Dak Nông tối ăm ‘nâi, tơklâm rơxế kơdroh laga mâu roh ki râ ó tâk hên, ki hên cho mâu “tíu hmâ trâm’’ ‘na tơklâm rơxế. Vâ kơdroh tơdroăng tơklâm rơxế, khu cheăng kan sát rak tơniăn troăng klông mơdêk tơdroăng séa ngăn, pơxâu phâk kơtăng mâu tơdroăng pro xôi.

“Tung la ngiâ, Ƀơrô Kan sát rak tơniăn troăng klông ƀă rơxế kơtâu pơtối pêi pro séa ngăn đi đo plâ hâi plâ măng, ƀă pêi pro chuyên đê ‘na séa ngăn ki vê têi mâu rơxế pơto tơmối, rơxế container, rơxế kân pơto tơmeăm... a tâi tâng troăng kân, ki rơhêng vâ tối cho a mâu tíu ai tơdroăng tơklâm rơxế. Pakĭng mê, tơrŭm đi đo ƀă kŏng an cheăm, khu séa ngăn troăng klông, pơtâng tối vâ kuăn pơlê a kơpong kơchơ mơdêk hlê plĕng rak luât troăng klông ƀă rơxế kơtâu, mơdât tơdroăng tơklâm rơxế’’.

Vâ tah lôi mâu ‘’tíu ki hmâ trâm’’ pro ôh tá tơniăn troăng klông a mâu troăng kân tơnêi têa, troăng kân kong pơlê, Khu rak rơniăn troăng klông kong pơlê Dak Nông hiăng pơkâ mâu khu cheăng tơrŭm rơtế mâu tơring pêi pro rơdêi tơdroăng pơtâng tối mơdêk hlê plĕng Luât rak tơniăn troăng klông, pêi pro tơdâng tơ’mô mâu troăng pêi cheăng, pơxâu phâk kơtăng mâu ngế ki xôi ôh tá rak tơniăn troăng klông.

Tơdrêng amê, pơtối lăm ngăn, séa ngăn, tơbleăng pơkâ Vi ƀan kong pơlê Dak Nông, khu tê mơdró pơkuâ mâu troăng kân BOT mơ’no liăn pro troăng kân, tah lôi mâu ‘’tíu hmâ trâm’’ ai tơdroăng tơklâm rơxế a mâu troăng kân, ki rơhêng vâ tối cho a troăng kân Tơnêi têa 14 (troăng kân Hồ Chí Minh) ƀă Troăng kân tơnêi têa 28.