*** Tơdrêng ƀă troăng hơlâ djâ kuăn pơlê lăm ối tíu ê, bêng Sông Cầu hiăng hbrâ mâu tíu ối tơdjuôm, hbrâ kế kâ, têa krúa, khu ngăn pơkeăng hlối mơhno mâu ngế gak ngăn plâ hâi măng a kơpong kơno tuk ƀă kơpong kuăn pơlê. Mâu hngêi đông păn ká a têa kơxĭ hiăng tối ôh tá ăm kuăn mơngế ối amê. Troh a Tôh kơphô̆ Từ Nham, pôa Đỗ Hữu Huy, Phŏ kăn hnê ngăn Đảng kong pơlê Dak Lak lăm séa ngăn a mâu tíu ai têa rơlâu kân, lăm ngăn kuăn pơlê a kơpong hmuâ ối ƀă hnê mơhno thế djâ tâi mâu rơpŏng ki u ối lăm ối tíu tơniăn.

Kong pơlê Dak Lak hiăng krếo thế kuăn pơlê pôi tá vêh dêi a hngêi drêng kong mêi khía ta hâi tâi; thế pêi pro tro  luât mơdât lo a têa kơxĭ ƀă pêi pro tro tiô khu râ pơkuâ cheăng hnê, tơniăn ăm mơngế tung 48 chôu ki ai kong mêi khía kân.

**** Riân troh kơhâi dế lơ 6/11, lâp kong pơlê Gia Lai hiăng kêi đeăng tâi tâng tơdroăng xĕn kuăn pơlê lối 100 rơpâu rơpŏng, troh mâu tíu ối hmuâ tơniăn. Hrĭng hngêi trung hriâm, hngêi hôp pơlê pơla ƀă tíu pêi cheăng kơ koan châ xúa pro tíu ối hmuâ kong mêi khía mơhot. Mâu hnôu ‘măn tơmeăm kâ, têa châu, têa kơxăng, pơkeăng châ po rơdâ ăm; khu cheăng rơnêu on tơhrik, hyôh phôn, khăm pơlât pơrá pêi cheăng 24/24 chôu  vâ tơniăn tơdroăng tơpui tơno, rak ngăn ivá ƀă tơdroăng kal vâ ăm kuăn pơlê.

Drêng ai tơdroăng ki ôh tá tơniăn dêi kong mêi khía mơhot, pôa Phạm Anh Tuấn – Kăn hnê ngăn Vi ƀan kong pơlê Gia Lai, Kăn pơkuâ Khu hnê mơhno ‘na kuăn pơlê ki cheăng, hiăng hnê mơhno pêi pro tơdroăng hbrâ râ 5 a 58 cheăm, bêng kơpong Gia Lai Peăng mâ hâi Lo (kong pơlê Bình Định ton).

Troăng tơmiêt hnê mơhno môi tuăn dêi kong pơlê cho tơniăn châ chăn dêi kuăn pơlê cho ahdrối; ôh tá lôi kuăn pơlê ối a kơpong rơ-iô. Tâi tâng mâu tơdroăng tro lup xua tơngôu, ngế ối a a tíu ki ôh tá tơniăn kong pơlê thế pôu râng hnoăng cheăng tơdrêng.

*** Hơnăm kố, kuăn pơlê kơpong têa kơxĭ Khánh Hoà pôi tá tơngôu. Lối 42 rơpâu plong tuk ƀă rơpâu ngế pêi cheăng a kung king Vân Phong ƀă kơpong têa kơxĭ Nha Trang hiăng châ thế lăm ối a kĭng. Hên rơpŏng ‘măn hên dêi mâu plong tuk kât ƀă kơxái ki kân, kât dêi mâu hơpăm, thăm nếo “pro ăm dêi plong krăm” môi pâ plong tuk chu tung kơpong têa trâu vâ kơdroh tơdjâk têa rơlâu kân.

A 6 kơno tuk tăng ká ƀá kơpong plong tuk tot a kĭng kơno, dâng 5.000 toăng tuk tăng ká hiăng troh a kơno tơniăn. Tung lâp kong pơlê, 9 tôh pêi cheăng râ kong pơlê châ Vi ƀan kuăn pơlê kong pơlê Khánh Hòa mơjiâng, lăm troh a cheăm bêng vâ hnê mơhno, séa ngăn ƀă hnê kuăn pơlê hbrâ ví.

Mâu khu râ pơkuâ cheăng châ pơcháu séa ngăn kơtăng tơniăn long kơdoăng têa, kơxái on tơhrik ƀă troăng tơpui phôn, hbrâ mâu rơxế, plong tuk, tơmeăm, mơngế vâ hbrâ ví kong mêi kân, têa rơlêa ƀă tơnêi tơhnâp, rak tơniăn má môi ăm kuăn pơlê.