Cheăm Yang Mao, kong pơlê Dak Lak cho môi tung mâu to cheăm ki tro tơdjâk ó dêi têa kân lân lu. Tiô riân ngăn apoăng, klêi rôh kong mê kân rôh kố, tâi tâng cheăm Yang Mao ai dâng 80 toăng hngêi tro têa lu trâu, tung mê ai 2 toăng hngêi tơhnâp tâi tâng ƀă 5 toăng hngêi tro têa mơhiu. Hên troăng prôk tung thôn ai tơnêi tro tơhnah, têa lân lu ai mâu kơpong.

Péa to kông ki pro pơtân a troăng Đông Trường Sơn tơ’nhiên ó. Troăng lăm ngi kong pơlê kơxô̆ 12 tro têa lu pro pá ăm tơdroăng ki prôk lăm tŏng xo mâu ngế hliăng tiâ. UBND cheăm hiăng pơtroh tâi tâng khu cheăng akố, cho kŏng an cheăm, khu ki rak vế kuăn pơlê ƀă mâu khu râ, tơkŭm gum kuăn pơlê gô̆m văng dêi hngêi trăng, xê̆n troh ối tíu tơniăn.

Tơdrêng amê hlối tơrŭm ƀă tíu pêi cheăng ‘mêng rơnêu troăng prôk a mâu tíu ki ai tơnêi tơhnah tơhnâp vâ pơto chơ tơmeăm tŏng gum ăm kuăn pơlê.

*Tung mâu hâi hdrối kố nah, kong mêi kân ton hâi pro têa lân lu ing kơnhŏng rĕng troh peăng hdroh, pro hên kơpong a cheăm Krông Bông, kong pơlê Dak Lak tro têa lu, klâ krê. Tung mê, thôn 27 cho môi thôn tung mâu tíu tro tơdjâk ó. Tiô Vi ƀan Kuăn pơlê cheăm Krông Bông, kơxêi hâi lơ 17/11, pŭn thôn: 27, 28, 29 ƀă 30 ƀă lối 500  rơpŏng kuăn pơlê hiăng tro klâ krê tâi tâng.

Tơdrêng amê, hên tíu hlối rơ-iô ăm hlo tơnêi tơhnâp. Mâu kăn cheăm hiăng hôp tơdrêng ƀă Khu cheăng hbrâ rơnáu dêi kuăn pơlê, pơtroh mâu ngế mâu lêng troh gak plâ hâi măng, hnhâng kơxái tơbleăng oh tá chiâng prôk, tâp hdró mâu tíu têa lu trâu, hlối tơkŭm djâ kuăn pơlê lăm ối a tíu tơniăn. Lối 100 ngế kăn ƀô̆, kŏng an, mâu lêng kuăn pơlê cơ động rơtế ƀă mâu ngế amê châ mơhnhôk đi đo; cheăm xuân xúa ca-nô ƀă tuk dêi khu mơdró vâ chơ tơmeăm tŏng gum.

*Kong mê kân mê ton, hên cheăm bêng a Khánh Hòa tro têa lân trâu, troăng prôk xuân tro têa lu. A văng Khánh Lê (troăng kân 27C), tơnêi tơhnah râ ó pro hên ngế hlâ rong. Kong mê kân mê pơtối pro kĭng troăng ki a rơhê Troăng kân 27C tơhnah, hên mâu hmốu ki kân klêh a troăng. Kơxo lơ 17/11, rôh tơnêi tơhnah ki ó pro mâu khu ki ai tŏng xo pơtân chiâng tro tơklâ. Troh 11 chôu, tâi tâng 15 ngế kăn ƀô̆ hiăng châ mơ’no lo ing kơpong ki rơ-iêo.

Kơ koan ki ai tơdjâk hiăng pơtroh lối chât toăng rơxế kơmăi kui, pro tơbăng, kui tah mâu hmốu tơnêi vâ pơtối lăm troh a kơpong ki tro tơhnah. A Pâ kơnhŏng Nha Trang, mâu troăng 23 Khế 10, Nguyễn Khuyến, 2 khế 4 ƀă hên troăng ki ê tro têa lân lu trâu; kơpong a kĭng kroăng Cái têa tâk đik a troh troăng. A Cam Ranh ƀă Cam Lâm, hên kơpong kuăn pơlê ối tro têa lu, ai rơpŏng ki ‘nâi athế hếo ối a kuâ hngêi tơkôm vâi troh tŏng xo. Khu ki ai tơdjâk pro tíu tơbleăng, xĕn kuăn pơlê lo ing kơpong ki thông, kơpong tíu ki tơ’lêi tro têa lân, tơnêi tơhnâp.