Tâi tâng kơlo liăn mơ’no 7 to hngêi trung cho 1.516 rơtal liăn, mơjiâng nếo tơdâng tơ’mô 212 kơbong hriâm ƀă mâu khu cheăng ƀă hngêi trăng, troăng klông. Mâu tơmeăm kô mơjiâng xiâm kối dêi hriâm tâp tơniăn, krá tơniăn ăm lối 7.000 hok tro kơpong tơkăng kong Gia Lai, ki hên cho hok tro hdroâng kuăn ngo.

Xông tơpui a leh pơxiâm mơjiâng pro, pôa Hồ Quốc Dũng, Phŏ Ngế pro xiâm hnê ngăn tơnêi têa tối nhên: tơdroăng tơkêa bro ai tơdroăng ki phá tơ-ê kal khât ƀă kơpong tơkăng kong, kum mơnhông mơjiâng mơngế pêi cheăng, pro krá tơniăn khu tơrŭm môi tuăn ƀă rak gâk kring tơniăn tơnêi têa. Pôa Hồ Quốc Dũng, Phŏ Ngế pro xiâm hnê ngăn tơnêi têa pơkâ kong pơlê Gia Lai hbrâ inhên, pơkuâ ƀă tơkŭm po mơjiâng pro dâi lĕm, tơdroăng mơjiâng pro.

Tơdrêng amê, pơkâ thế Khu xiâm pơkuâ Hnê hriâm ƀă Hnê mơjiâng tuăn ngôa rơkê rĕng mơjiâng kêi đeăng mâu troăng pơkâ pêi, troăng hơlâ tŏng gum hok tro hdroâng kuăn ngo, ki má lối cho mâu troăng hơlâ ki tơdjâk troh kâ ối, prôk lăm, hriâm tâp.

Xuân tung hâi lơ 16/11, Vi ƀan kuăn pơlê kong pơlê Quảng Ngãi tơkŭm po leh Pơxiâm pro 4 to hngêi trung phôh thong ai tíu kâ koi ối pơtê pơtối râ sap Râ má môi troh râ má Péa a  mâu cheăm tơkăng kong Dục Nông, Sa Loong, Rờ Kơi ƀă Mô Rai. Tơbleăng a leh pơxiâm mơjiâng pro, pôa Nguyễn Hòa Bình - Phŏ Ngế pro xiâm hnê ngăn tơnêi têa tối nhên, mâu tơmeăm khoăng mơjiâng pro ôh tá xê to tíu hriâm tâp dêi hok tro mê ối cho vâ pơtih tuăn loi, tuăn mơ-eăm mơnhông ƀă môi tuăn pơla kơpong tơbăng ƀă kong ngo, pơla kuăn pơlê tung lâp tơnêi têa ƀă kuăn pơlê a tíu tơkăng kong. 

Tơdroăng pơxiâm pro hngêi trung phôh thong pơtối pro a kơpong tơkăng kong dêi kong pơlê Quảng Ngãi cho tơdroăng pêi pro ai pơxúa, mơhno hnoăng cheăng pêi dêi Đảng, Tơnêi têa ƀă tơdroăng hnê hriâm ƀă kuăn pơlê kơpong hơngế hơngo tíu tơkăng kong.