Kot mâ ƀă xông kân a thôn Lại Đà, cheăm Đông Hội, tơring Đông Anh, Pơlê kong kân Hà Nội - môi pơlê ki tơniăn ƀă mâu kuăn pơlê têm rơpiât, la tơdroăng ki hmâ pêi pro sap nah kơhnâ hriâm ƀă cho ngế kuăn hơdrui tung môi rơpŏng hngêi pêi to chiâk, krâm nhŏng o. Pôa Nguyễn Phú Trọng - Kăn xiâm pơkuâ hnê ngăn Đảng châ mâu vâi pú hriâm ƀă pâ kơ pôa mơngê châ ‘nhông kŭn, mâ hleăng ki tơviah, malối têm rơpiêt ƀă kơhnâ tung hriâm. Kơ’nâi mê, pêi hên hnoăng cheăng pro kăn ‘na tơdroăng ki kal xua Đảng, Tơnêi têa ƀă kuăn pơlê pơcháu, mê cho: Ngế cheăng tung Khu xiâm Đảng hneăng 7 troh hneăng 13; Ngế cheăng tung Khu xiâm Kal kí sap hneăng 8 troh hneăng hneăng 13; Ngế xiâm pơkuâ Khu rah chêh hlá tơbeăng Kŏng sản; Kăn xiâm hnê ngăn Hô̆i đong Tơpui kâ Xiâm tơnêi têa; Kăn pơkuâ hnê ngăn Đảng Pơlê kong kân Hà Nội; Kăn  xiâm hnê ngăn Kuô̆k hô̆i; Kăn xiâm hnê ngăn tơnêi têa; Kăn xiâm pơkuâ hnê ngăn Đảng sap hneăng 11 troh hneăng 13, pôa Nguyễn Phú Trọng  hiăng pêi hên hnoăng cheăng ki kân, ki kal  tung mâu hơnăm pêi cheăng ăm kăch măng dêi Đảng ƀă hdroâng mơngế. Pôa Đào Duy Quát - Ngế phŏ pơkuâ tơdroăng Kal kí xiâm tơnêi têa tối:

”Tâi tâng mâu hnoăng cheăng pêi tơná pôa Nguyễn Phú Trọng hiăng pêi ƀă tâi tâng tuăn rơkê hbrâ rơnáu, pêi cheăng tro tiô khoa hok, pêi tâi hnoăng tơná ƀă tuăn ngôa hriăn rơkê châ hriâm tơ’nôm ing  mâ hlo tung rêh ối mê pôa hiăng pê klêi hnoăng cheăng pơcháu. Malối hnoăng cheăng pro Kăn xiâm pơkuâ hnê ngăn Đảng 3 hneăng pôa hiăng tơrŭm môi tuăn ing khu xiâm kal kí, Kăn xiâm pơkuâ hnê ngăn Đảng, Khu kăn Xiâm troh tơdroăng môi tuăn tung tâi tâng Đảng”.

Tơdroăng rêh ối môi tiah kuăn pơlê ôh tá pơkrip mơnhôm, hmâ achê ƀă mâu kuăn pơlê châ mơhno ăm hlo tung tơdroăng cheăng pêi lơ tung tơdroăng rêh ối dêi pôa. Ƀă đảng viên - pôa Phùng Huy Đan, pôa hlo  tung Kăn xiâm pơkuâ hnê ngăn cho ngế ki ai hiâm mơno lĕm dêi kăch măng ôh tá pơkrip mơnhôm, hmâ achê ƀă kuăn pơlê ƀă rêm ngế. Ki pro hmếo ối pâ ôh tá kâi piu kơ pôa mê cho drêng veăng 4 roh trâm mâ kuăn pơlê dêi Khu kăn Kuô̆k hô̆i tíu tâ phĭu kơxô̆ 1 Pơlê kong kân Hà Nội tíu pôa Nguyễn Phú Trọng - Kăn xiâm pơkuâ hnê ngăn cho Kăn Kuô̆k hô̆i ƀă ta troh nôkố, ki ối pâ mê xuân môi tiah ối hlo tuăn tơmiêt dêi Phùng Huy Đan ngế kuăn pơlê:

 “A  mơnê khât ‘nâng châ trâm pôa Trọng a 4 rôh veăng trâm mâ kuăn pơlê, pôa lăm trâm mâ tơpui tơno ƀă kuăn pơlê, drêng kuăn pơlê kơ êng pôa tơmâng hlối chêh xo. Klêi mê, tối tơbleăng drêng mơgêi mê pôa  hlối tối, tâi tâng mâu vâi pôa, vâi meh, vâi miê mê cho mâu ngế ki hlê rơkê, ‘nâi plĕng nhên ‘na luât pơkâ. Xua mê, mâu vâi pôa, vâi meh, miê hiăng ai hnoăng veăng ‘no pơxúa ăm Kuô̆k hô̆i, tơdroăng mâu vâi pôa vâi meh, miê tối mê tro ‘nâng, pó hiăng kriâo tro tíu ki dế thĕn, pơla châ pơtê iâ mê pôa lo rup kŏng ƀă rêm ngế. Ngế ki lâi xuân vâ tâng tơkŭm xup um ƀă pôa”.

Cho ngế kăn pơkuâ xiâm ki kân dêi Đảng, pôa Nguyễn Phú Trọng Kăn xiâm pơkuâ hnê ngăn Đảng tơmâng khât troh hên ngế, hên kơvâ cheăng pêi, sap khoa hok, hnê hriâm - hnê mơjiâng tuăn ngôa rơkê troh túa lĕm tro, rơhdruê xuăng, ‘na hlá tơbeăng, sap tơdroăng kơdroh kơklêa xăm kơtiê troh hnê mơhno tơdroăng pâ nhoăm tơnêi têa ƀă tơdroăng ‘na kăch măng ăm rơxông kơ’nâi..., troh alâi xuân hlo pôa kơhnâ vâ pêi cheăng tá tuăn mơno ai hnoăng pêi cheăng kơhnâ khât. Troh a Pơlê kong kân Hồ Chí Minh ‘’tâng pơ-eăng to inâi pôa” ƀă kuăn pơlê peăng Hdroh tơnêi têa “Hên ngế pâ nhoăm”, Kăn xiâm pơkuâ hnê ngăn Đảng púi vâ Pơlê kong kân Hồ Chí Minh cho Pơlê kong kân ai tuăn pâ, hên tơdroăng veăng kum, rơkê plĕng; kuăn pơlê ai tơdroăng rêh ối phâi tơtô, hơniâp lĕm, vâ ai tiah mê pơlê kong kân thế pơtối ‘no liăn mơjiâng tơmeăm khoăng pơ’lêh nếo, mơnhông tơƀrê tâi tâng tŭm tơdroăng hnê hriâm ƀă hnê mơjiâng tuăn ngôa rơkê, mơnhông tơƀrê hên mơngế pêi cheăng rơkê, malối cho mâu ki pêi cheăng rơkê khât, mâu ngế pơkuâ xiâm, mâu ngế cheăng rak ngăn; mơnhông tơƀrê rơdêi khoa hok- kŏng ngê̆ rơtế ƀă Mơnhông cheăng kâ rơkê tâ, pro xiâm ki vâ mơnhông Pơlê kong kân xông tơƀrê rĕng ƀă krá  ton.

‘Na Đảng ƀô̆, kuăn pơlê mâu hdroâng kuăn ngo kong pơlê tơkăng kong Lạng Sơn, Kăn xiâm pơkuâ hnê ngăn Đảng tối pơchân, ƀă hnoăng cheăng pêi cho ngế ki “râk krá tơnêi têa’’ ‘na tơdroăng cheăng lêng, kring tơniăn, hlối cho ngế ki ‘’rak krá ‘na cheăng kâ”, tơniăn krá ‘na tê mơdró tung tơnêi têa xuân cho kring vế hnoăng pơkuâ, tơniăn cheăng kâ tơnêi têa; hbrâ pêi mâu tơdroăng cheăng tơƀrê tung tơpui kâ hlối tơrŭm ƀă  lâp plâi tơnêi, mơjiâng tơkăng kong hơniâp, pro xiâm tơ’lêi hlâu vâ mơnhông cheăng kâ - rêh ối kong pơlê, dêi kơpong kong ngo peăng kơnhŏng ƀă lâp tơnêi têa.

Ƀă Pơlê kong xiâm Hà Nội, ôh tá xê to tuăn pâ ƀă tơnêi têa tíu kot mâ ƀă xông kân, mê ối cho hnoăng pêi ki tơviah ƀă Pơlê xiâm - plâi nuih dêi lâp tơnêi  têa, pôa Nguyễn Phú Trọng - Kăn xiâm pơkuâ hnê ngăn Đảng đi đo tơmâng khât ƀă hnê tối nhên khât, ai pơxúa kal ƀă tơdroăng mơnhông tơƀrê la ngiâ ƀă ton ta ah. Pôa Nguyễn Phú Trọng - Kăn xiâm pơkuâ hnê ngăn Đảng đi đo rơrêk tung hiâm mơno tối:

‘’Tối troh Pơlê kong xiâm Hà Nội, tung hiâm mơno mơngế kuăn tơnêi têa Việt Nam xuân rơrêk, hâk tơngăm ‘na tơnêi rơpâu hơnăm rơkê ƀă Khên tơnôu, hlối lĕm, Pơlê kong xiâm ‘nâi hlê plĕng ‘nâi tơdroăng ki tro ki ôh, ‘na ki lĕm kuăn mơngế, Pơlê kong kân hơniâp, klêi mê” mơhé prôk troh ulâi tung plâi tơnêi, hiâm mơno xuân pâ dêi Hà Nội”. Cho tiah mê ‘nâng,  plâ rơxông pêi cheăng ‘’xua tơnêi têa, xua kuăn pơlê”, Pôa Hồ Chí Minh ai tơdroăng pâ ki tơviah troh dêi Pơlê Kong xiâm Hà Nội.  Hà Nội xuân cho tíu ki rơtế ƀă tơdroăng kal tung rơxông pêi cheăng kăch măng dêi Pôa, môi tung mâu tíu ki pôa Hồ Chí Minh - Kăn xiâm hnê ngăn tơnêi têa hneăng apoăng rêh ối ƀă pêi cheăng ton má môi, tíu ai hên inâi hdró chêng Pôa, drêng tối ‘na Hà Nội, Pôa hmâ tơpui pái chư “Pơlê xiâm pin”. Tung hâi apoăng Pơlê kong xiâm châ tơleăng lĕm (lơ 10/10/1954), Pôa hiăng chêh: “Lâp tơnêi têa ngăn ngi Pơlê kong xiâm pin, lâp plâi tơnêi tơkôm a Pơlê kong xiâm pin, tâi tâng pin veăng ‘no ivá  rak tơniăn, kring tơniăn, pro ăm Pơlê kong xiâm pin chiâng môi Pơlê kong xiâm hơniâp lĕm, rơdêi tá tơmeăm khoăng ƀă tuăn ngôa, kô cho tơdroăng tơmâng khât ƀă xuân cho pơkâ thế, púi vâ, loi khât vâ Hà Nội mơnhông tơƀrê, djâ troăng a hdrối, pro xiâm mơhno ăm lâp tơnêi têa môi tiah Pôa Hồ hiăng tối pơchân ƀă Pơlê kong xiâm pin’’.

Sap ing mâu rôh lăm troh ƀă pôa, kuăn pơlê ƀă tí tăng ngăn hlo khât, mâu tuăn tơmiât ki nếo, ki ai khât ƀă tơdroăng mâ hlo châ pôa Nguyễn Phú Trọng Kăn xiâm pơkuâ hnê ngăn pơkâ thế ƀă Đảng, Tơnêi têa tung pơkâ troăng vâ pêi, luât pơkâ tŏng gum, vâ tơniăn rĕng tung pêi cheăng kâ-rêh ối ƀă mơnhông tơnêi têa, mơjiâng chuh ngiah xah hô̆i. Ƀăng mâu tơdroăng pêi pro ăm hlo, pôa Nguyễn Phú Trọng hiăng pêi  mơhno ăm hlo i nhên um méa môi ngế kăn pơkuâ rơkê kơhnâ, pêi cheăng tro hlối ai khât, khên tơmiât, khên pêi, khên pôu râng dêi hnoăng cheăng a ngiâ Đảng, a ngiâ kuăn pơlê, xua mê hiăng châ kuăn pơlê pâ nhoăm.

Plâi nuih Mơngế kŏng sản dêi pôa Nguyễn Phú Trọng - Kăn xiâm pơkuâ hnê ngăn Đảng hiăng kơtê ihiâm la tâi tâng Đảng, tâi tâng kuăn pơlê ƀă tâi tâng mâu lêng pin xuân ối chôu pâ môi tiah hlo um méa môi ngế ki rơkê kân dêi Kăch măng Việt Nam, ngế ai tuăn ngôa rơkê, ngế rơkê túa lĕm tro, hlá cờ xiâm ‘na Tơpui kâ dêi Đảng, rêh ối plâ rơxông xua tơnêi têa, xua kuăn pơlê, xua tơdroăng ki kơnía lĕm.