Ƀơrô Chin phuh hiăng ai hlá ơ-éa tối tơdroăng tơpui dêi pôa Phạm Minh Chính, Ngế pro xiâm hnê ngăn Chin phuh môi tuăn tơkŭm po Hneăng hôp tơpui tơno dêi Ngế pro xiâm hnê ngăn Chin phuh ƀă droh rơtăm hơnăm 2023. Hneăng hôp tiô tối hdrối tơkŭm po a hâi lơ 26/3 la ngiâ, a Tíu pêi cheăng Chin phuh. Ngế pro xiâm hnê ngăn tơnêi têa pơcháu ăm Khu xiâm pơkuâ kăn ƀô̆ tơbleăng Pơkâ pêi tơkŭm po Hneăng hôp tơpui tơno dêi Ngế pro xiâm hnê ngăn Chin phuh ƀă droh rơtăm hơnăm 2023; hbrâ nhên mâu khu rơkong kơ-êng tơniăn lĕm ƀă mot tung hiâm mơno mơngế, pơtroh tơdroăng pơtâng hnê tối nhên, tro khât, achê tơdroăng nôkố ki droh rơtăm pói vâ.

Tơdroăng xiâm tơpui tơno ai tơdroăng pêi pro troăng pơkâ pêi, troăng hơlâ ƀă mâu pơkâ dêi luât ƀă droh rơtăm; tơdroăng pêi cheăng dêi mâu kơ koan, khu tơrŭm ki tơdjâk hnoăng ƀă ki pơxúa tiô luât dêi droh rơtăm; hnoăng cheăng, pôu râng hnoăng dêi droh rơtăm tung hriâm tâp, pêi cheăng, pơtâp, veăng mơnhông mơdêk cheăng kâ – rêh ối pơlê pơla ƀă gak kring tơnêi têa.