Rôh lăm pôu Singapore dêi pôa Phạm Minh Chính, Ngế pro xiâm hnê ngăn tơnêi têa po tung pơla tơrŭm cheăng tung la ngiâ pơla Việt Nam – Singapore mơnhông kơhnâ, rơdêi tung mâu kơvâ cheăng.

Hơnăm 2023, péa tơnêi têa tơbâ 50 hơnăm mơjiâng tơrŭm cheăng tơpui kâ ƀă 10 hơnăm mơjiâng tơrŭm cheăng tung la ngiâ. Singapore rak vế hnoăng cheăng djâ troăng ahdrối tung ASEAN ƀă ối má 2/141 to kong têa ƀă kơpong tơnêi tơníu ‘no liăn cheăng a Việt Nam ƀă lối 3 rơpâu tơdroăng tơkêa ki châ xêt khât ƀă tâi tâng kơxô̆ liăn chêh tối vâ tơrŭm cheăng kâ châ 70 rơtal dollars.

Rôh lăm pôu dêi pôa Phạm Minh Chính cho vâ mơnhên ăm tơrŭm cheăng kâ Việt Nam – Singapore tâk troh a hvêa prôk ki nếo tung pơla ai hên mâu tơdroăng tơkêa tê mơdró tơniăn krê (FTA) rơxông nếo, veăng ai hnoăng dêi Việt Nam ƀă Singapore châ xêt khât ƀă châ tơbleăng, tung mê ai tơkêa tơrŭm tung tâi tâng ƀă tơdroăng mơnhông tơkâ luâ Thái Bình Dương (CPTPP), Tơkêa kong têa tơrŭm cheăng kâ tung tâi tâng kơpong (RCEP).