Pôa Phạm Minh Chính, Ngế pro xiâm hnê ngăn Chin phuh pơkâ hbrâ inhên mâu pơkâ ăm hơnăm hriâm nếo.

Pôa Phạm Minh Chính pơkâ kơvâ Hnê hriâm ƀă hnê mơjiâng tuăn ngôa rơkê, mâu Khu xiâm, kơvâ Tơnêi têa ƀă mâu kong pơlê tơkŭm pêi pro 9 hnoăng cheăng ki xiâm, tá: Tơkŭm pêi pro Mơgêi kơxô̆ 91 dêi Khu xiâm kal kí pơtối pêi pro Pơkâ Pơhlêh nếo, mơdêk ki xêt khât, châ tơƀrê tơdroăng pơkuâ tơnêi têa tung tơdroăng hnê hriâm.

Mơdêk ki rơkê khu thái cô, giảng viên ƀă kăn ƀô̆ pơkuâ hnê hriâm, tơxâng pơkâ nôkố ƀă tung hneăng nếo kơvâ Hnê hriâm; Hriăn plĕng, mơnhên tâi tâng ‘na pơhlêh nếo tơdroăng hnê hriâm, kơxop mơ-éa hnê hriâm nếo; Khu xiâm pơkuâ Hnê hriâm ƀă Hnê mơjiâng tuăn ngôa rơkê ƀă mâu kong pơlê hbrâ pơkâ pêi tơkŭm po hneăng tơ’noăng mơgêi râ má pái phôh thong hơnăm 2025 tiô Tơdroăng hnê hriâm phôh thong ki nếo.

“Ahdrối mot hơnăm hriâm nếo 2024 – 2025, rơkâu tâi tâng khu kăn ƀô̆ pơkuâ, thái yăo, cô yăo đi đo mơnhông hiâm mơno pôu râng hnoăng cheăng ƀă pêi tá hiâm mơno ƀă tơdroăng hnê hriâm, tah lôi mâu tơdroăng pá puât, tơkâ hluâ rêm pơloăng mơnúa, mơ-eăm ƀă pơkâ pơhlêh nếo ki xiâm, tâi tâng hnê hriâm ƀă hnê mơjiâng tuăn ngôa rơkê, tơxâng tơdroăng pói vâ dêi Đảng, Tơnêi têa ƀă kuăn pơlê, djâ hdroâng mơngế Việt Nam chiâng môi hdroâng mơngế rơkê, môi tiah Pôa Hồ Chí Minh, Kăn xiâm hnê ngăn tơnêi têa hneăng apoăng nhuô̆m pâ ƀă tơdroăng pói vâ.

Rơkâu hơnăm hriâm nếo 2024 – 2025 châ tơƀrê lĕm; mâu thái yăo, cô yăo mo sêi, hơniâp lĕm, veăng gum hên tâ mê nếo ăm tơdroăng pêi cheăng ‘’hnê mơjiâng’’; hok tro, sinh viên đi đo cho kuăn nguô̆n, hok tro rơkê, pêi pro châ tơƀrê mâu tơdroăng pói vâ, tơdroăng ki tơmiât tung hiâm mơno, veăng gum mơjiâng pơlê xiâm, tơnêi têa rế hía rế kro mơdrŏng lĕm’’.