Kơxo lơ 24/2, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh pơkuâ hneăng hôp tâi tâng tung lâp tơnêi têa hơnăm 2023. Hneăng hôp po tơdrêng a tíu xiâm Chin phuh ƀă hôp mơ’no tơdrêng ƀă xiâm 63 to kong pơlê, pơlê kong kân râ xiâm tơnêi têa. A hneăng hôp, mâu kăn hiăng tối tơdrăng tơdroăng pêi pro, ƀai hriâm tơdroăng cheăng ƀă mâu tơdroăng hâi pêi, ki pêi hâi tro tung tơdroăng pro hlá mơ-éa tro luât ối tơvâ tơvân hên, malối tung rôe tơmeăm, ‘no liăn mơjiâng tơmeăm khoăng, tơrŭm tê mơdró, rak ngăn, xúa tơmeăm khoăng tơnêi têa.

Ivá pêi cheăng dêi khu cheăng khăm pơlât a cheăm, ‘na hnrâ mơdât pơreăng hâi rơkê; hâi tơƀrê; tơdroăng ki ối tơkŭm hên ngế pơlât a râ kơpêng hâi kâi tơkâ luâ. Tơbleăng a hneăng hôp, pôa Phạm Minh Chính khĕn kơdeăn mâu tơdroăng cheăng ki kơvâ ngăn pơkeăng hiăng châ pêi tơƀrê tung hơnăm hdrối, pơtroh rơkong mơnê rơkâu ki lĕm má môi ăm tâi tâng kơvâ ngăn pơkeăng drêng troh leh tơbâ hâi ƀok thái pơkeăng lơ 27/2.

Tung la ngiâ, Ngế pro xiâm hnê ngăn tơnêi têa pơkâ thế kơvâ ngăn pơkeăng pơtối pêi tơdroăng ki lĕm, pêi tơƀrê mâu troăng rơhlâ, luât pơkâ dêi Đảng  pơkâ thế kring vế, rak ngăn mơdêk ivá kuăn pơlê mo lĕm ƀă tơdroăng ngăn pơ’leăng mâ mơngế. Ngế pro xiâm hnê ngăn tơnêi têa xuân tối nhên mâu tơdroăng ki u ối pá, pơloăng mơnúa kal thế pêi kơtăng vâ kâi tơkâ luâ.