Tơpui a rôh hôp, pôa Phạm Minh Chính, Ngế pro xiâm hnê ngăn tơnêi têa tối nhên, klêi kơ’nâi lối 10 hơnăm tá khu pơkuâ tơdroăng kal kí tơdjuôm ivá tung tơdroăng ăm mung liăn tŏng gum rêh ối pơlê pơla hiăng chiâng môi tơdroăng ki bâ ƀă cho môi tơdroăng ki xiâm tung mâu kơ koan tŏng gum kơdroh kơtiê, rak vế tơniăn ăm tơdroăng rêh ối pơlê pơla, pêi pro châ tơdroăng púi vâ dêi kuăn pơlê, malối cho mơngế kơtiê ƀă mâu ngế ki pá puât tung pơlê pơla.

Tung la ngiâ ah, Ngế pro xiâm hnê ngăn tơnêi têa pơkâ thế Hngêi rak liăn Tŏng gum rêh ối pơlê pơla kal pơtối mơnhên tơdroăng ki ăm mung liăn tŏng gum rêh ối pơlê pơla cho troăng hơlâ ki kal vâ pêi pro mâu troăng hơlâ, troăng tŏng gum, hnoăng cheăng dêi Đảng, Tơnêi têa ‘na thăm mơdêk cheăng kâ prôk rơtế ƀă pêi pro tơdâng tơ’mô pơlê pơla, pêi pro mâu tơdroăng pơkâ tơnêi têa xuân môi tiah mơnhông mơdêk cheăng kâ rêh ối pơlê pơla dêi tơnêi têa.