Rôh hôp hiăng tơpui tơno, ăm rơkong veăng tơpui ‘na 3 tơdroăng tơkêa luât mê cho: Luât pơkuâ ngăn ƀă ‘no liăn pêi cheăng cho liăn ngân tơnêi têa a khu mơdró kâ; Luât nâp hnoăng liăn mơhá khu mơdró kâ (‘mâi hơ’lêh); Luât Nâp hnoăng liăn mơhá ki tơviah (‘mâi hơ’lêh).

Rơtế ƀă tơdroăng ki ăm rơkong veăng tơpui ‘na rêm tơdroăng tơkêa ki nhên, pôa Phạm Minh Chính, Ngế pro xiâm hnê ngăn tơnêi têa tối nhên mâu tơdroăng ki pơkâ thế drêng mơjiâng, ‘mâi rơnêu mâu tơdroăng tơkêa Luât. Mê cho athế tơtrŏng axoăng râ, axoăng hnoăng pơkuâ, rơtế prôk ƀă tơdroăng ki axoăng kơxô̆ liăn, mơdêk ivá pêi pro, pơkâ nhên hnoăng cheăng dêi rêm ngế ki châ axoăng râ, axoăng hnoăng, kơchuâ chêh nhên vâ séa ngăn, thăm mơdêk hbrâ mơdât hnoăng pơkuâ.