A roh tơdah, pôa Phạm Minh Chính - Ngế pro xiâm hnê ngăn tơnêi têa hiăng nhuô̆m pơtroh rơkong mơnê păng ‘nâng troh Chin phuh ƀă kuăn pơlê Ấn Độ ‘na mâu tơdroăng tuăn pâ ăm pôa Nguyễn Phú Trọng -  Kăn xiâm pơkuâ hnê ngăn Đảng; pơtroh kơ koan râ xiâm troh lăm pôu ngăn ‘mé râ tơnêi têa ƀă Kuô̆k hô̆i Ấn Độ hiăng mơdoh chôu tơbâ Kăn xiâm pơkuâ hnê ngăn Đảng tung hâi lơ 22/7 pơla kố nah.

Tơdroăng ki kố mơhno tuăn pâ dêi mâu ngế pú hmâ ki achê, xuân môi tiah tiô khôi vâi krâ nah kơnía pơla péa hdroâng mơngế Việt Nam ƀă Ấn Độ. Pôa Phạm Minh Chính, Ngế pro xiâm hnê ngăn tơnêi têa pơkâ thế péa tơnêi têa mơnhông rơdêi tâ mê nếo ƀă tối rơdêi, tơrŭm cheăng tung kơvâ khoa hok ƀă kŏng ngê̆, thŏng tin – troăng hyôh phôn, kŏng ngê̆ kơxô̆ cho mâu kơvâ ki ai ivá mơnhông, kal châ tơmâng mơdêk tâ mê nếo.