Peăng xêi hâi lơ 17/3, a tíu pêi cheăng dêi Chin phuh, pôa Phạm Minh Chính, Ngế pro xiâm hnê ngăn Chin phuh pơ-eăng mâu khu pú hên, mâu ngế krê pêi pro hnoăng cheăng tŏng xo mơngế hliăng tiâ a Thổ Nhĩ Kỳ. Hneăng ki tơnêi tơdro, rơlâm tơhnâp kân ó a kong têa Thổ Nhĩ Kỳ riân sap ing hơnăm 1939, pro lối chât rơpâu ngế hlâ, lối hrĭng rơpâu ngế tro rong, lối chât rơpâu tơmeăm khoăng tơ’nhê tơ’nhĕng, Thổ Nhĩ Kỳ athế pơkâ tơdroăng tŏng kum tơdrêng a 10 to kong pơlê, tơdrêng amê, krếo thế mâu kong têa tung lâp plâi tơnêi rơtế veăng tŏng kum.

Ƀă hiâm mơno ki tơdrăng, kơhnâ khât, Việt Nam hiăng ăm thế 100 ngế, tung mê ai 76 ngế dêi Khu xiâm ngăn lêng ƀă 24 ngế dêi khu xiâm pơkuâ ngăn Kŏng an hiăng veăng tơdroăng tí tăng ngăn, tŏng xo, tŏng veăng, mâu vâi ki mê hiăng tơkâ luâ hên tơdroăng xahpá, xâu rơ-iô. Xông tơpui a roh leh mê, pôa Phạm Minh Chính, Ngế pro xiâm hnê ngăn Chin phuh hiăng kơdeăn khĕn, pơ-eăng Khu xiâm pơkuâ ngăn lêng, Khu xiâm ngăn ‘na Kŏng an hiăng veăng hnê tối ăm Chin phuh tung tơdroăng tŏng kum mâu kong têa tung lâp plâi tơnêi; pơkuâ djâ, hnê mơhno, tơrŭm cheăng krá kâk ƀă mâu khu râ, kơvâ cheăng xiâm dêi mâu kong pơlê, pơlê kong kân ƀă mâu khu râ lêng ai tơdjâk troh vâ pêi pro tơniăn lĕm ăm hneăng lăm tŏng xo, tŏng kum, hbru kum kế tơmeăm, tŏng veăng khu mơngế ki hliăng tiâ, xahpá a kong têa Thổ Nhĩ Kỳ, hnối pêi pro kêi đeăng ki tơtro khât hnoăng cheăng tơná; ing mê, veăng mơdêk inâi, hnoăng cheăng, ki rơkê, ki kơhnâ, lĕm tro dêi Việt Nam tung lâp plâi tơnêi.