Kơxê lơ 15/3, pôa Phạm Minh Chính, Ngế pro xiâm hnê ngăn tơnêi têa hiăng troh lăm pôu pêi cheăng Tíu xiâm tŏng kum pơlê pơla kong pơlê Hải Dương. Nôkố Tíu xiâm ai lối 200 ngế kăn ƀô̆, mâu ngế pêi cheăng, pêi tơdroăng păn, rak ngăn, hnê văn hŏa, hnê cheăng pêi ăm vâ chê 477 ngế vâi hdrêng kuăn tê, mơngế chó chêng tơvê kŏng, mơngế krâ ôh tá ai kuăn ‘nĕng rak ngăn, mâu ngế tro kok, tung mê, ai 327 ngế vâi hdrêng dế hriâm văn hŏa. Tiô tơbleăng, ai dâng 10% mâu vâi o drêng xông kân kô kâi roăng rak dêi tơná.

Xông tơpui a roh trâm mâ, Ngế pro xiâm hnê ngăn tơnêi têa pói vâ mâu kăn ƀô̆, mâu ngế pêi cheăng Tíu xiâm đi đo pêi tá hiâm mơno, pêi tâi hnoăng dêi tơná, ngăn mâu ngế châ rak ngăn a kố môi tiah nhŏng o tung rơpŏng, mơhnhôk, mơnhông, tơbleăng tơdroăng ăm ngế chó chêng tơvê kŏng hâk vâ mơ-eăm, mâu vâi o ối kŭn ôh tá mơhúa tung tơdroăng rêh ối đi đo mơ-eăm, mơ-eăm xông tơtêk.

Tơdrêng amê, thế ai troăng hơlâ, troăng tŏng kum ki phá tơ-ê, tơtro ƀă mâu ngế pêi tơdroăng cheăng kố, vâ vâi pêi hên tâ nếo ƀă tơdroăng cheăng, ƀă Tíu xiâm.