Kơxo hâi lơ 15/2, tung tơdroăng cheăng pêi a Bến Tre, pôa Phạm Minh Chính, Ngế pro xiâm hnê ngăn tơnêi têa hiăng lăm ngăn a tíu, hnê pêi tơdroăng tơkêa pro kông Rạch Miễu 2 a tơring Châu Thành hlối lăm ngăn a troăng kĭng têa kơxĭ Bến Tre. Tơdroăng tơkêa mơjiâng pro kông Rạch Miễu 2 tơkâ luâ kroăng Tiền tơdjêp ƀă kong pơlê Tiền Giang - Bến Tre. Kông mê xŏn 17,6km, ai tâi tâng  kơxô̆ liăn ‘no mơjiâng pro lối 5.175 rơtal liăn klâ ăm 6 hdroh liăn mơjiâng pro.

Troh a tíu dế pro kông, Ngế pro xiâm hnê ngăn tơnêi têa thế Tiền Giang ƀă Bến Tre mơhnhôk tăng tá khu cheăng kal kí rĕng pêi klêi tơdroăng ‘mâi xĕn gu tơnêi, rĕng rak tơniăn tơdroăng rêh ối ăm kuăn pơlê a tíu pro pơlê nếo thế rêh ối tơniăn tâ lơ tơ ‘mô ƀă tíu ối ton.

Klêi mê, mâu khu mơjiâng pro tơkŭm mơngế, rơxế, xúa kŏng ngê̆, kih thuât tung pêi cheăng, pêi plâ hâi măng, pêi teăm, tơkŭm mơjiâng pro tro tiô khoa hok vâ rĕng klêi, mơ-eăm pê klêi kông Rạch Miễu 2 a khế10/2025 vâ koh tơbâ Hneăng hôp kân Đảng ƀô̆ kong pơlê Bến Tre, rĕng tâ 6 khế tâng vâ pơchông ƀă tơdroăng dế pơkâ (khế 4/2026), vâ tơniăn tơƀrê, tro kih thuât, lĕm mơnâ, tơniăn ăm mơngế mơjiâng pro kông, pêi krúa lĕm hyôh kong prâi, ví ‘no liăn mơjiâng pro tâk hên, mơdât kâ kơluâ, pro ôh tá tro, mơ’nhiê liăn ngân, ‘nâi tơmâng khât troh tơdroăng rêh ối dêi kuăn pơlê.