Kơxo lơ 11/4, pôa Phạm Minh Chính, Ngế pro xiâm hnê ngăn Chin phuh hiăng séa ngăn ôh tá tối hdrối tơdroăng pêi pro Pơkâ 30 dêi Chin phuh ‘na rôe tơmeăm khăm pơlât ƀă Pơkâ 07 dêi Chin phuh ‘na pơkuâ tơmeăm khăm pơlât a Hngêi pơkeăng kân Bạch Mai, Hngêi pơkeăng pơlât vâi hdrêng tơnêi têa ƀă Tíu khăm pơlât Đông Anh, Hngêi pơkeăng Nhiê̆t đơ̆i Tơnêi têa a Hà Nội.

Ngế pro xiâm hnê ngăn tơnêi têa mơnhên, Đảng, Tơnêi têa tơmâng hên troh ivá châ chăn dêi kuăn pơlê, klêi kơ’nâi ai tơdroăng ôh tá bê pơkeăng ƀă ai hnê mơhno teăm tơdrêng; pơchân mâu ngế tamo châi hmiân tuăn pơlât vâ rĕng prêi lĕm.

Ƀă tơdroăng hngêi ối, tíu ối ăm mâu ngế tamo châi, Ngế pro xiâm hnê ngăn tơnêi têa tối, tơnêi têa dế tung tơdroăng mơnhông mơdêk, tơmeăm khoăng dêi mâu hngêi pơkeăng tá hâi tơxâng châ pơkâ pói vâ, thế rak tơniăn chôa ‘lâng, ki má lối cho a Hngêi pơkeăng pơlât vâi hdrêng Tơnêi têa, tá hâi tŭm tơmeăm vâ klâ mâu ngế tamo châi ƀă nhŏng o tung rơpŏng hngêi; pơkâ thế hngêi pơkeăng ƀă mâu ngế nhŏng o tung hngêi tơrŭm, pro tơ’lêi hlâu má môi vâ rơtế rak ngăn ăm mâu ngế tamo châi, ví pro pá puât.