Kơxê lơ 4/12, pôa Phạm Minh Chính, Ngế pro xiâm hnê ngăn Chin phuh rơtế ƀă khu râ kăn pêi cheăng dêi Chin phuh hiăng ai roh pêi cheăng ƀă khu râ kăn pơkuâ kong pơlê Bạc Liêu vâ mơnhên tơdroăng châ tơƀrê mơnhông mơdêk cheăng kâ – rêh ối pơlê pơla hơnăm 2022 ƀă pơkâ troăng prôk tung la ngiâ; tŏng kum mâu tơdroăng pơkâ, mâu tơdroăng pá puât, tơvâ tơvân vâ tŏng kum kong pơlê Bạc Liêu mơnhông mơdêk tơtro tâ mâu tơmeăm ki ai hlâu, mâu tơmeăm ki rơdêi, mơnhông mơdêk rĕng, krá tơniăn.

Xông tơpui a roh pêi cheăng, pôa Phạm Minh Chính pơkâ, kong pơlê Bạc Liêu pơtối hlê plĕng pêi pro, po rơda pêi pro châ tơƀrê Pơkâ Hneăng hôp má XIII dêi Đảng; Pơkâ thế hneăng hôp Đảng ƀô̆ kong pơlê. Rơtế amê Ngế pro xiâm hnê ngăn tơnêi têa pơkâ, tơtrŏng tơdroăng pơkâ pêi vâ mơnhông mơdêk tơmeăm ki ai hlâu, tơmeăm ki rơdêi, po tíu mơnhông mơdêk nếo. Thâ pêi kêi đeăng, tơbleăng ăm Ngế pro xiâm hnê ngăn Chin phuh kĭ ƀă po rơdâ pêi pro châ tơƀrê Pơkâ pêi kong pơlê rơxông 2021 – 2030, tơmiât pêi troh hơnăm 2050.

Thăm rak tơniăn cheăng lêng – gâk kring, rak tơniăn tơdroăng kring vế, tơdroăng kal kí, rak tơniăn pơlê pơla; tơrŭm krá tơniăn ƀă kong têa pú hmâ ƀă tơniăn tung gâk kring kơpong tơkăng kong, pro tơ’lêi hlâu ƀă tíu tơ’lêi hlâu mơnhông mơdêk cheăng kâ – rêh ối pơlê pơla.