Ngế pro xiâm hnê ngăn tơnêi têa pơkâ mâu kong pơlê rĕng rơnêu troăng kơxái on tơhrik, têa krúa, troăng klông, hyôh phôn. Pơtối séa ngăn, mơhnhôk rêm rơxế kơmăi kơmok gum mâu rơpŏng tro kơklêa, xĕn kuăn pơlê troh tíu tơniăn; rak tơdroăng xing xoăng phái thế chê pêi pro tơdrêng tung hâi lơ 14/11; tơdrêng amê, pơtối kơbông krếo mâu khu tê mơdró, mâu ngế ki lăm tŏng gum kuăn pơlê ƀă ‘’tuăn pâ hdroâng kuăn ngo, tuăn pâ kuăn pơlê’’ tŏng gum kuăn pơlê tơkâ hluâ pá puât.

Hdrối mê, tung roh lăm pôu pêi cheăng a kong pơlê Gia Lai, kơhâi dế lơ 13/11, pôa Phạm Minh Chính, Ngế pro xiâm hnê ngăn tơnêi têa hiăng troh lăm pôu, pêi cheăng ƀă Mô đô̆i Gâk tơkăng kong kong pơlê Gia Lai, pơkuâ roh hôp ƀă mâu khu xiâm, kơvâ cheăng, kăn pơkuâ ki xiâm kong pơlê Gia Lai ‘na todroăng rơnêu kế tơmeăm khoăng xua mơhot roh má 13.

Ngế pro xiâm hnê ngăn tơnêi têa pơkâ thế kong pơlê thế ‘măn tơdrêng kơxô̆ liăn 60 rơtal liăn vâ pro kơpong vêh xĕn ối tung tơdroăng ki thâ, tơniăn ăm kuăn pơlê a tíu ối nếo. Tối rơdêi tơdroăng thâ kal pro tơniăn pêt mơjiâng tơmeăm, tê mơdró, Ngế pro xiâm hnê ngăn tơnêi têa pơkâ thế mâu khu cheăng kơtăng tung roh tŏng gum mơgrúa, rơnêu vâ ai tơnêi pêt mơjiâng tơmeăm. Hngêi arak liăn thế pro ton, pơhlêh chêl a roh ki ê, ai kơxô̆ liăn mung vâ khu tê mơdró rơnêu kế tơmeăm khoăng xua mơhot têa kân lân lu; vêh po tơdroăng hnoăng mơhá, liăn mơ’no, kơxô̆ liăn vâ mơ’no rôe tơmeăm; rĕng pro tơniăn klêi mâu hngêi trung hriâm ƀă mâu hngêi pơkeăng khăm pơlât.

Kong pơlê Gia Lai hiăng tối hdrối tâi tâng tro lŭp dâng 5.900 rơtal liăn. Ngế pro xiâm hnê ngăn tơnêi têa pơkâ thế Khu xiâm pơkuâ liăn ngân kal tơdâng tơ’mô tơdroăng tơdjuôm vâ ai tŏng gum tơtro, teăm tơdrêng.