Kơxo lơ 27/3, pôa Phạm Minh Chính, Ngế pro xiâm hnê ngăn Chin phuh pơkuâ po rôh hôp Chin phuh ‘na tơdroăng mơjiâng luât khế 3/2023. Ngế pro xiâm hnê ngăn tơnêi têa tối nhên, hnoăng cheăng mơjiâng, pêi pro klêi tơdroăng pơkâ cho hnoăng cheăng ki tiah hmâ, pơtối ƀă ton xŏn, kal tơkŭm pơkuâ hnê mơhno, mơdêk pơxâu; tŏng kum hên tâ nếo ‘na liăn ngân, mâu ngế pêi cheăng.

A rôh hôp kố, mâu kăn cheăng tung Chin phuh tơpui tơno ƀă ăm rơkong tơpui tối ƀă 5 tơdroăng ki kal mê cho 2 kơxop hlá mơ-éa luât, 1 tơdroăng pơkâ thế mơjiâng luât, 2 kơxop hlá mơ-éa pơkâ mê cho: Kơxop hlá mơéa Pơkâ dêi Kuô̆k hô̆i ‘na pơkâ pêi pro mâu tơdroăng pơkâ tŏng kum xơpá, tơvâ tơvân tung ‘no liăn mơjiâng pro troăng prôk; Ai mâu troăng hơlâ nếo tung kơvâ rak ngăn ‘na mâu ngế ki mot tung tơnêi têa, lăm ngi kong têa ê, rêh ối dêi mơngế kong têa ê a Việt Nam vâ ‘mot tung tơdroăng pơkâ tơdjuôm dêi Kuô̆k hô̆i a Hneăng hôp má 5; Tơdroăng tơkêa Luât Căn cước công dân ki ‘mâi rơnêu; tơdroăng tơkêa Luât tơrŭm tơdroăng loi tĭng tiô khôp ki ‘mâi rơnêu; Tơdroăng pơkâ mơjiâng Luât ki ‘mâi rơnêu, ‘mot tơ’nôm mâu tơdroăng dêi Luât Mot tơnêi têa ƀă lăm ngi kong têa ê dêi kuăn pơlê Việt Nam.