A rôh trâm mâ, Ngế pro xiâm hnê ngăn tơnêi têa phiu ro châ lăm pôu Singapore drêng dế pro Ngế pro xiâm hnê ngăn Chin phuh Việt Nam hlối trâm tơpui tơno ƀă mơngế kuăn pơlê Việt Nam ƀă mâu kăn ƀô̆, mâu ngế pêi cheăng tíu cheăng teăng mâ a Singapore. Ngế pro xiâm hnê ngăn tơnêi têa loi khât, tơdroăng tơpui rôh lăm pôu kô pro xiâm ki mơdêk nếo tơrŭm cheăng rế rơdêi, trâu rơdâ tâ, khât tâ, tơƀrê pơla péa tơnêi têa, péa hdroâng kuăn ngo tung mâu kơvâ cheăng.

Mơngế ki ối a xiâm Chin phuh Việt Nam xuân tối hâi pêi cheăng ƀă kuăn pơlê a kố, pôa ăm ‘nâi, hâi kố, pôa kô hôp tơpui tơno hlối trâm mâ ƀă pôa Lý Hiển Long Ngế pro xiâm hnê ngăn tơnêi têa ƀă mâu kăn xiâm ki ê dêi Singapore.  Ngế pro xiâm hnê ngăn tơnêi têa kô tơpui ƀă kăn xiâm Singapore ‘na mâu tơdroăng vâ pêi ƀă troăng rơhlâ ki nhên khât vâ mơdêk loi nhoăm dêi rơpó tung tơdroăng kal kí, mơdêk ki kal tơrŭm cheăng ing tơdroăng pro xiâm tơrŭm cheăng, malối cho ‘na cheăng kâ; troh tơdroăng mơjiâng “Tơrŭm cheăng kâ kơxô̆ - Cheăng kâ tơ’lêi hlâu, tơniăn pơla Việt Nam - Singapore”.

‘Na mâu tơdroăng púi vâ, pâ thế dêi kuăn pơlê, Ngế pro xiâm hnê ngăn tơnêi têa môi tuăn, hnê tối, tơmâng xo mâu tơdroăng hnê tối mê ƀă kô pơcháu ăm mâu khu xiâm, kơvâ cheăng, kơ koan tơdjâk tơkŭm, tí tăng ngăn, rĕng ai troăng rơhlâ tơtro ing tơdroăng teăm tơdrêng, hlê plĕng dêi rơpó.