Kơxê lơ 1/3, a tíu pêi cheăng dêi Chin phuh, pôa Phạm Minh Chính, Ngế pro xiâm hnê ngăn Chin phuh hiăng tơdah pôa Olivier Becht, Ngế xiâm ngăn ‘na tê mơdró, tơ’mot cheăng kâ ƀă ngế Pơhlăng a kong têa ê. Péa pâ tơmâng xo mâu tơdroăng tơrŭm cheăng ki kal châ pêi pro tung hơnăm hdrối, malối cho tê mơdró pơla péa pâ pơtối tâk rơdêi, châ 5,3 rơtal dollars hơnăm 2022, tâk 10% tâng vâ pơchông ƀă hơnăm 2021.

Pôa Phạm Minh Chính, Ngế pro xiâm hnê ngăn Chin phuh pơkâ thế Pơhlăng  pro tơ’lêi hlâu ăm tơmeăm Việt Nam châ tê tơmeăm ing chiâk deăng ăm kong têa ê, malối cho ká xi xŏng châ tê a kong têa Pơhlăng; púi vâ péa pâ pơtối tơrŭm krá, xúa rôh tơ’lêi hlâu ki kân ing tơdroăng kĭ tơhrâ tê mơdró tơniăn xua Việt Nam - EU vâ mơdêk tơpui tơno tê mơdró pơla péa pâ.

Rôh kố, Ngế pro xiâm hnê ngăn Chin phuh pơkâ thế Pơhlăng rĕng kĭ tơhrâ kring vế ‘no liăn cheăng dêi Việt Nam - EU vâ pro hlâu ăm tơrŭm ‘no liăn cheăng ôh tá pơrah, péa pâ rơtế ai pơxúa; mơhnhôk thế Vi ƀan châu Âu  rĕng tah lôi theh trĭng IUU ƀă ƀă ká xi xŏng Việt Nam, vâ pơxúa ăm mơngế ki rôe xúa dêi Pơhlăng ƀă EU xuân môi tiah kring tơniăn tơdroăng rêh ối ăm hrĭng rơpâu ngế pêi cheăng tung kơvâ ‘na ká xi xŏng Việt Nam.