Tung roh lăm pôu pêi cheăng a kong têa Hà Lan, pôa Phạm Minh Chính, Ngế pro xiâm hnê ngăn tơnêi têa hiăng veăng hneăng hôp tơpui tơno Khu tê mơdró Việt Nam – Hà Lan. Xông tơpui a tơdroăng ki kal, pôa Phạm Minh Chính tơbleăng ‘na roh hôp tơpui tơno tá hiâm mơno, phiu ro ƀă châ tơƀrê ƀă Ngế pro xiâm hnê ngăn kong têa Hà Lan, cho pôa Mark Rutte.

Ngế pro xiâm hnê ngăn tơnêi têa tối nhên, Hà Lan cho kong têa hlê plĕng hên tung mơ’no liăn cheăng a Việt Nam. Hà Lan cho kong têa mơ’no liăn cheăng kân má môi tung mâu kong têa EU mơ’no liăn cheăng a Việt Nam, xuân cho khu tơrŭm cheăng kân má péa dêi Việt Nam a châu Âu.

Tung la ngiâ, ƀă mâu tơdroăng mơ-eăm, khŏm kơdô dêi péa pâ ƀă ki má lối cho tơdroăng tơrŭm cheăng krá tơniăn dêi kuăn pơlê péa tơnêi têa, Ngế pro xiâm hnê ngăn tơnêi têa loi tơngah khât, tơrŭm cheăng mơ’no liăn cheăng – tê mơdró kô pơtối cho tơdroăng ki xiâm kal khât tung tơrŭm cheăng pơla Việt Nam – Hà Lan, tơdrêng amê cho tơdroăng vâ djâ tơrŭm cheăng pơla péa tơnêi têa to a ‘ngêi tâ.