Tung rôh lăm pôu păng ‘nâng troh a kong têa Ƀih, kơxê hâi lơ 15/12, pôa Phạm Minh Chính, Ngế pro xiâm hnê ngăn Chin phuh hiăng veăng hôp a rôh hôp Khu mơdró kâ Việt Nam - Ƀih. Tơpui a rôh po hneăng hôp, Ngế pro xiâm hnê ngăn tơnêi têa ăm ‘nâi, tơrŭm tơroâ ƀă tơrŭm pơla Việt Nam ƀă kong têa Ƀih dế hlo tơniăn lĕm khât bă ôh tá la lâi pơtê ‘mâi mơnhông ƀă mơdêk tung tâi tâng mâu kơvâ sap ing tơdroăng cheăng kal kí, cheăng kâ, mơhno túa lĕm tro, hnê hriâm ƀă hên ki ê.

Nôkố, Ƀih ai tâi tâng kơxô̆ liăn chêh inâi ‘no pêi cheăng a Việt Nam tâk troh vâ chê 11 rptal dollars; kơxô̆ liăn châ xo ing tê mơdró pơla péa pâ Việt Nam - Ƀih tiô riân hơnăm 2022 châ vâ chê 5 rơtal dollars. Ngế pro xiâm hnê ngăn tơnêi têa rơhêng vâ khu mơdró kâ Ƀih ƀă châu Âu pơtối pêi pro hơ’lêh kế tơmeăm pêi pro hên kơchơ tê mơdró, pêi pro hơ’lêh tơrŭm cheăng tê vâ mơdêk tê mơdró tơƀrê krá ton a Việt Nam; pơkâ thế mâu khu mơdró kâ Ƀih ƀă châu Âu pơtối ‘no liăn cheăng ƀă krếo thế tơ’nôm mâu khu mơdró kâ pú ‘no liăn pêi cheăng a Việt Nam.