Kơxê hâi lơ 22/3, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa ai rôh pêi cheăng ƀă Khu kăn Hô̆i đong ngăn tê mơdró dêi Mih - ASEAN (USABC). A rôh pêi cheăng, Ngế pro xiâm hnê ngăn tơnêi têa  tối, Việt Nam đi đo ngăn Mih cho môi tung mâu kong têa tơrŭm cheăng kal má môi, hâk mơnê Mih veăng kum Việt Nam rơdêi, tơniăn ƀă hơniâp.

Việt Nam púi vâ mơdêk tơrŭm cheăng tung tâi tâng tơdroăng pơla Việt Nam - Mih rế ai pơxúa, tơniăn, tro tiô tơdroăng nhoăm dêi rơpó, tro hnoăng pơkuâ, tâi tâng tung kong têa ƀă luât pơkâ kal kí dêi rơpó. Ngế pro xiâm hnê ngăn tơnêi têa tối, Việt Nam vâ rôe kơmăi kơmok, tơmeăm xúa, tơmeăm pro ki kố ki mê ing Mih vâ ‘mâi mơnhông todâng tơ’mô tung tê mơdró Việt Nam- Mih.

Ngế pro xiâm hnê ngăn tơnêi têa loi khât, USABC ƀă mâu khu mơdró Mih kô veăng ‘no hnoăng mơdêk tơrŭm cheăng tung tâi tâng pơla Việt Nam - Mih rế ai pơxúa, ƀă rế trâu rơdâ ing tơdroăng péa pâ rơtế ai pơxúa, pro pơxúa mơnhông mơdêk ƀă kun cheăng pêi ăm kuăn pơlê péa tơnêi têa, veăng pơtối rak vế, hơniâp, rak tơniăn tơrŭm ƀă mơnhông mơdêk a kơpong ƀă tung lâp plâi tơnêi.