Kơxê lơ 7/3, pôa Phạm Minh Chính, Ngế pro xiâm hnê ngăn Chin phuh hiăng pơkuâ po rôh trâm mâ mâu kăn teăng mâ kơdrâi pơkuâ, rak ngăn mâu kơ koan Tơnêi têa ƀă diâp pri Kovalevskaia drêng Hâi vâi kơdrâi lâp plâi tơnêi lơ 8/3. Tơpui a rôh trâm mâ, pôa Phạm Minh Chính rơkâu ƀă khĕn kơdeăn mâu tơdroăng cheăng dêi vâi kơdrâi Việt Nam hiăng pêi pro klêi tung pơla hdrối nah.

Tung la ngiâ ah Ngế pro xiâm hnê ngăn tơnêi têa pơkâ thế, pơtối séa ngăn kơtăng, pêi pro tơƀrê tơdroăng pơkâ Hneăng hôp 13 dêi Đảng; tơbleăng nhên mâu tơdroăng pơkâ, Tơdroăng pơkâ dêi Tíu xiâm Đảng, Khu xiâm pơkuâ tơdroăng kal kí, Khu kăn pơkuâ hnê ngăn Đảng ‘na hnoăng cheăng kăn ƀô̆ vâi kơdrâi, tơdâng tơ’mô pơla kơnốu ƀă kơdrâi, xua tơdroăng ki pơ’lêh rơkê dêi vâi kơdrâi, veăng kum pêi châ tơƀrê mâu tơdroăng pơkâ mơnhông mơdêk krá tơniăn troh hơnăm 2030.

A rôh trâm mâ Ngế pro xiâm hnê ngăn tơnêi têa diâp 02 pri Kovalevskaia ăm 10 khu ki hriăn ‘na khoa hok cho vâi kơdrâi ki rơkê tung hriăn ngăn khoa hok. Kố cho mâu ngế ki djâ troăng ahdrối tung vâi kơdrâi ‘na hơ’lêh nếo, rơkê plĕng, khên tơmiât, khên pêi, teăng mâ ăm mâu tuăn ngoâ rơkê, tơdroăng rơhêng vâ dêi Việt Nam.