A kong pơlê Hòa Bình, pôa Phạm Minh Chính, Ngế pro xiâm hnê ngăn tơnêi têa nếo veăng leh pơxiâm po troăng kân tơdjêp kơpong Hòa Bình – Mộc Châu. Tơdroăng tơkêa bro Troăng kân tơdjêp kơpong Hòa Bình – Hà Nội ƀă troăng kân ăm phêp rơxế kơtâu têi Sơn La (Hòa Bình – Mộc Châu) ƀă tâi tâng kơxô̆ liăn mơ’no 4.120 rơtal liăn ƀă xŏn vâ chê 50km kô chiâng kơpong pakĭng ki kal, tơdjêp mâu troăng kân, kum kơdroh troăng prôk ƀă chôu prôk troăng tiô troăng Hà Nội – pơlê kong kơdrâm Hòa Bình – Kim Bôi, thăm mơdêk ivá tơdjêp, tê mơdró mâu kong pơlê Hà Nam – Hòa Bình – Phú Thọ - Sơn La ƀă troăng klông tơnêi têa.

Xông tơpui a roh leh, pôa Phạm Minh Chính, Ngế pro xiâm hnê ngăn tơnêi têa pơkâ ƀă tơdroăng pêi pro tơdroăng tơkêa bro cho rak tơniăn tơdroăng mơjiâng pro. Ngế pro xiâm hnê ngăn tơnêi têa pơkâ Khu xiâm pơkuâ troăng klông, mâu khu xiâm kơvâ cheăng ki tơdjâk tơrŭm krá tơniăn ƀă kong pơlê Hòa Bình vâ teăm tŏng kum tơdrêng , hnê mơhno tung tơdroăng drêng kal, rak tơniăn tơdroăng pêi pro tơdroăng tơkêa bro châ tiô pơkâ, dâi lĕm tiô pơkâ.