Kơxê lơ 21/3, a tíu pêi cheăng Kăn xiâm hnê ngăn tơnêi têa, pôa Võ Văn Thưởng, Kăn xiâm hnê ngăn tơnêi têa hiăng tơdah Ngế pro xiâm phŏ, ngế xiâm tơpui kâ ƀă Tơrŭm cheăng lâp plâi tơnêi Kul - pôa Prak Sokhonn drêng rôh lăm pôu păng ‘nâng Việt Nam ƀă rơtế pơkuâ po hneăng hôp rôh má 20 Vi ƀan tơrŭm cheăng Việt Nam – Kul ‘na tơrŭm cheăng kâ, Mơhno túa lĕm tro, Khoa hok ƀă Kih thuât. A rôh tơdah, pôa Võ Văn Thưởng tối, tơngah Kul kô tơkŭm po ƀlêi chiâng rôh tâ phĭu pôk kăn Kuô̆k hô̆i khế 7/2023, pơtối pêi pro châ tơƀrê kân tung hnoăng cheăng mơjiâng tơnêi têa Kul hơniâp lĕm, tơniăn krê ƀă kro mơdrŏng.

Việt Nam đi đo tâi ivá ngăn nhuô̆m ƀă rơhêng vâ ôh tá la lâi pơtê mơdêk tơrŭm cheăng tơnêi têa ki a chê tơniăn lĕm, tơrŭm tơroâ tiô khôi hmâ, tơrŭm tung tâi tâng, krá tơniăn ton xŏn” ƀă Kul. Ngế pro xiâm phŏ, ngế xiâm tơpui kâ Kul tối nhên, Kul đi đo ngăn nhuô̆m tơrŭm tơroâ ƀă tơrŭm cheăng ƀă Việt Nam. Rơkâu mâu tơdroăng ki pêi pro châ rơhéa kân ki kuăn pơlê Việt Nam pêi châ rơhéa tung hnoăng cheăng mơnhông mơdêk cheăng kâ rêh ối pơlê pơla; loi tơngah Việt Nam kô pêi klêi tơdroăng pơkâ hơ’lêh kơmăi kơmok rơkê plĕng a hơnăm 2030.

*** A Tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh xuân hiăng tơdah pôa Prak Sokhom, Ngế pro xiâm phŏ hnê ngăn tơnêi têa, Ngế xiâm tơpui kâ ƀă tơrŭm cheăng lâp plâi tơnêi kong têa Kul. Vâ djâ tơrŭm cheăng péa tơnêi têa pơtối mơnhông mơdêk châ tơƀrê, pôa Phạm Minh Chính, Ngế pro xiâm hnê ngăn tơnêi têa pơkâ thế péa pâ tơkŭm pêi pro châ tơƀrê mâu tơdroăng môi tuăn khu râ kăn xiâm, mâu tơbleăng tơdjuôm pơla péa tơnêi têa; thăm pêi pro rơdêi tơrŭm cheăng, tơdjêp troăng klông, tơdjêp péa kong têa cheăng kâ, rơtế mơjiâng tơdroăng cheăng kâ tơniăn krê, pơkuâ xêh ƀă tơdroăng mot tơrŭm lâp plâi tơnêi trâu hơngế, păng ‘nâng ƀă châ tơƀrê.

Tung pơla hơnăm 2023 tơkŭm po hên tơdroăng ki kal a kong têa Kul, tung mê ai tâ phĭu rah xo Kuô̆k hô̆i hneăng má VII, Hneăng tơ’noăng ivá peăng mâ hâi lo pá hdroh châu Á (Para Games), Hneăng hôp khu râ kăn xiâm Pái víu mơnhông mơdêk Kul – Lếo – Việt Nam roh má 12, Ngế pro xiâm hnê ngăn tơnêi têa mơnhên, tung ivá dêi tơná, Chin phuh Việt Nam hbrâ tŏng kum, tối túa ki rơkê tơtro ƀă tŏng kum kong têa Kul tơkŭm po châ tơƀrê tơdroăng cheăng kal kố.