Sap ing kơ’nâi Hneăng hop kân má 13 dêi Đảng, tơdroăng rêh ối, pêi cheăng lâp plâi tơnêi hiăng ai hên ki pơhlêh rĕng, pá puât, ôh tá ‘nâi ahdrối, pro ăm tơdroăng tơrŭm cheăng dêi tơnêi têa Việt Nam trâm hên xahpá, pơloăng mơnúa. Maluâ ti mê, hơnăm 2023, 2024 hiăng châ hlo nhên mâu tơdroăng tơrŭm tơpui kâ ƀă kong têa ê ai hên ‘nâng, pơtối đi đo, ƀă xuân cho tíu ki bâ eăng má môi dêi tơnêi têa. Tơdroăng ki tơnêi têa pin tơdah kăn xiâm pơkuâ ngăn, Kăn xiâm hnê ngăn kong têa Lếo cho pôa Thongloun Sisoulith; klêi mê tơdah pôa Hun Sen, pôa Hun Manet, Kăn xiâm hnê ngăn Đảng Nhân yân Kul, nếo achê pơla kố, cho pôa Vladimir Putin - Kăn xiâm pơkuâ kong têa Rusi ƀă hên mâu kăn xiâm kong têa ê dêi ASEAN, Khu lâp kong têa, Khu kơpong Mekong, APEC, AIPA, COP 28 ƀă hên mâu kong kong têa ê châ vêh mơnhên tối cho mâu tơdroăng ki ai pơxúa kân khât ăm tơnêi têa, veăng gum vêh mơnhên “ta hâi chói hlo la lâi tơnêi têa pin ai roh ki tơ’lêi hlâu, kuăn mơngế, tơmeăm khoăng, châ hên kong têa loi tơngah ƀă tơdroăng ki châ ô eăng tung lâp plâi tơnêi tiah hâi kố”. Khoh châ ai tiah mê, kơnôm ing tuăn tơmiât, mâ ngăn ƀă troăng prôk ki tơrŭm tơpui kâ rơkê krê tơvaih dêi ngế ki ối a ko tơnêi têa. Mê cho pôa Nguyễn Phú Trọng - Kăn xiâm pơkuâ hnê ngăn. Pôa Lê Hoài Trung - Ngế kăn pơkuâ hnê ngăn tung Khu xiâm pơkuâ hnê ngăn Đảng, Ngế xiâm tơpui kâ dêi Tơnêi têa vêh mơnhên tối:

“Pin hlo nhên pôa Nguyễn Phú Trọng tŏng gum ngăn khât hnoăng cheăng ki tơrŭm tơpui kâ, tung mâu ƀai xông tơpui đi đo ai mơnhên tối ƀă mâu hdroâng mơngế ki lâi tung pơla mơjiâng ƀă mơnhông mơdêk pơrá athế ai péa tơdroăng, mê cho mơdêk tung tơnêi têa ƀă tơrŭm ƀă mâu kong têa vâi pú, mơnhên hnoăng cheăng tơrŭm tơpui kâ ƀă kong têa ê, ôh ta xê to tơdroăng ki rơkê to tung tơnêi têa mê ối cho ivá ki ó rơdêi ăm tơdroăng ki mơnhông tơnêi têa. Tơdroăng ki ê nếo, mê cho hiâm mơno dêi Kăn xiâm pơkuâ hnê ngăn ‘na mâu tơdroăng athế pêi pro mê pro ti lâi đi đo pơkâ nhên troăng hơlâ ki tơrŭm tơpui kâ la tơniăn krê ăm tơná tơnêi têa, tơná pin châ pơkuâ ngăn dêi xêh, pêi pro hên tơdroăng cheăng, Việt Nam cho pú hmâ ƀă tâi tâng mâu kong têa tung lâp tơnêi têa, cho mâu ngế ki kơhnâ khât ‘na pôu râng hnoăng cheăng tung khu kong têa tung lâp plâi tơnêi; rak vế krá kâk hiâm tuăn, troăng prôk ki tơrŭm tơpui kâ rơkê tung rêm tơdroăng ki nếo ai, đi đo hlê plĕng nhên tơdroăng ki ai dêi chal nếo, tơdroăng ki pơhlêh rĕng dêi tơdroăng, tung tơnêi têa pin ƀă tung lâp plâi tơnêi. Ki má lối pôa đi đo tối nhên, tâng lơ xôi ‘na troăng prôk, kô chiâng tơdjâk xôi tâi tâng tơdroăng ki ê”.

Pôa Nguyễn Phú Trọng - Kăn xiâm pơkuâ hnê ngăn đi đo tối mơnhên tung  kơvâ tơrŭm tơpui kâ ƀă kong têa ê athế: “Rế krá kâk tiô troăng hiăng pơkâ, rế chôa pơhlêh tiô troăng nếo krá tơniăn; rơpâ, ƀĕng ƀeăn, la xuân athế khên tơnôu, khŏm mơdêi; rơkê plĕng, tiô túa nếo la xuân athế tro tiô hiâm mơno, troăng prôk ki hiăng pơkâ, maluâ drêng trâm tơdroăng pa puât, pơloăng mơnúa; xua ing tơdroăng ki đi đo rak vế krê tơniăn dêi hdroâng mơngế, xua tơdroăng ki tơ’lêi hlâu, tơdroăng hơniâp ro dêi kuăn pơlê; tơrŭm, hơ-ui pâ la khŏm kơtăng, khŏm krá kâk tung kring vế, gak ngăn tơdroăng ki pơxúa dêi tơnêi têa-hdroâng mơngế”. Ƀă tơdroăng ki hiăng tối a Roh hôp tơrŭm tơpui kâ kong têa ê lâp tơnêi têa a hơnăm 2021, pôa Nguyễn Phú Trọng pa môi hdroh nếo mơnhên rơdêi tiah kố: “Tơrŭm tơpui kâ ƀă kong têa ê dêi Việt Nam athế rơkê, hbrâ rơnáu hdrối, klê plĕng ƀă rơpâ rơmuăn tung mơnhông pêi cheăng kâ ƀă thăm mơdêk inâi dêi tơnêi têa” ƀă hên hĕng mâu tơdroăng ki ê, ing mê ăm hlo, tơdroăng ki tŏng gum, ngăn khât, ối cho tơdroăng tôu tuăn dêi Kăn xiâm pơkuâ ngăn tơnêi têa ƀă tơdroăng cheăng tơrŭm tơpui kâ. Ôh ta xê iâ xôh, pôa Nguyễn Phú Trọng hiăng ai tối pơchân tiah kố: pêa kơ’nâi mâu ngế ki tơrŭm tơpui kâ dêi tâi tâng Đảng, tâi tâng kuăn pơlê, tâi tâng khu lêng. Mê cho ki xiâm dêi mâu kăn Teăng mâ ki rak vế, pêi pro lĕm tro hnoăng cheăng tơná ki kân kĕng ƀă pôu râng hnoăng cheăng ki kal; kring vế, rak ngăn tơniăn ki pơxúa dêi tơnêi têa, dêi hdroâng mơngế ƀă thăm mơdêk tơrŭm cheăng lâp plâi tơnêi, tŏng gum ăm tơdroăng ki mơnhông pêi cheăng kâ-rêh ối pơlê pơla dêi tơnêi têa.

Phó Yăo sư - Tiê̆n sih Dương Văn Quang, Kăn pơkuâ ngăn Học viện Ngoại giao (Ối tung Khu xiâm ngăn ‘na tơrŭm tơpui kâ ƀă kong têa ê) tối tiah kố: tâng tối ‘na pôa Nguyễn Phú Trọng - Kăn xiâm pơkuâ hnê ngăn mê cho tơdroăng ki xiâm vâ chôu tơbâ troh mơngế “ki djâ troăng, pro pơtôu hiâm mơno”, chiâng ai ivá ó rơdêi ăm kơvâ tơrŭm tơpui kâ dêi Việt Nam:

“Pôa Nguyễn Phú Trọng - Kăn xiâm pơkuâ hnê ngăn rêm xôh hôp ‘na tơdroăng tơrŭm tơpui kâ la lâi xuân ai ƀai xông tơpui ki vâ hnê pơchân khu kăn ƀô̆ ngăn ‘na tơpui kâ dêi Việt Nam. Mâu tơdroăng ki xiâm mê cho pơchân môi ngế ki tơpui kâ chal nếo nôkố ôh tá khoh lôi ‘na khôi túa, vêa vong. Tơrŭm tơpui kâ athế ki xiâm ing tơdroăng ki pơxúa dêi tơnêi têa, hdroâng mơngế, todrêng amê, ngế ki kố athế hlê plĕng ki nếo, túa cheăng ki nếo ƀă khom athế tí tăng hriăn  plĕng. Pin hlê plĕng lâp plâi tơnêi nếo chiâng athế tơpui tơno ƀă vâi, mê cho rơkong tơpui pơchân tối dêi Kăn xiâm pơkuâ ngăn Đảng ƀă kơvâ ngăn ‘na tơpui kâ dêi Việt Nam”.

Pôa Đặng Minh Khôi - Kăn teăng mâ Việt Nam a kong têa Rusi đi đo chôu vế tro rơkong tối pơchân dêi kăn xiâm pơkuâ hnê ngăn dêi tơnêi têa - mê cho Ngế teăng mâ, kăn pơkuâ kơ koan Việt nam a kong têa ê athế pêi pro, mơhno tối tơbleăng ‘na túa lĕm tro, ki xiâm rêi, túa cheăng dêi mơngế Việt Nam. Ki rơhêng vâ tối ƀă mâu ngế cheăng tơpui kâ ối athế thăm mơdêk hiâm mơno tơrŭm, hơ-ui gum, ‘nâi mơ’nhôp dêi châ, ‘nâi pro mơ’răng, ‘nâi droh, ‘nâi mơnhông, ‘nâi dêi roh, ‘nâi dêi chal, ‘nâi dêi châ ti lâi, ‘nâi vâi ti lâi, ‘nâi ki vâ mơnhông tơtêk krá kâk,  ‘nâi tơdroăng ki ton tơrôu, tơdroăng ôh tá tro. Tâi tâng cho ing tơdroăng ki pơxúa ăm tơnêi têa, hdroâng mơngế:

“Pôa Nguyễn Phú Trọng - Kăn xiâm pơkuâ hnê ngăn ai tối tiah kố, tơdroăng tơpui kâ Việt Nam athế mơhno tối túa lĕm tro, túa cheăng, ki xiâm rêi dêi mơngế Việt Nam, Maluâ ai tơdroăng ki lâi, xuân athế khên tơnôu, krá kâk la xuân athế rơpâ, rơmuăn môi tiah kơlá, đi đo rak vế hiâm mơno ƀă tuăn tơmiât ki vâ tơplâ, maluâ trâm tro tơdroăng ki pá lơ niân xuân athế rak vế krá kâk tiô troăng hơlâ hiăng pơkâ”.

Pôa Hùng Ba - Kăn teăng mâ a kong têa Sinuâ a Việt Nam tối nhên: Mâu hơnăm achê pơla kố, Việt Nam pêi pro tiô troăng hơlâ “tơrŭm tơpui kâ kơlá” cho ki rơkê tiô kơ tơdroăng ‘na troăng hơlâ krá tơniăn ton, ing tơdroăng ki kring vế, rak ngăn hnoăng tơniăn krê, tơná pin pơkuâ ngăn dêi hnoăng cheăng, kơhnâ khât tâ nếo tung mơnhông tơrŭm nhŏng o ƀă mâu kong têa tung lâp plâi tơnêi. Hnoăng cheăng tơrŭm tơpui kâ dêi Việt Nam hiăng châ kơdĭng hên tơdroăng ki kal xiâm  kân khât, kơjo mơnhông tơrŭm cheăng ƀă mâu kong têa ki ối tâ tá achê, kong têa ki kân ƀă mâu kong têa tơrŭm cheăng tiô khôi hmâ; khŏm rak vế krá kâk cho vâ pêi pro tiô tơdroăng tơrŭm hên kong têa.

Mâu hnoăng cheăng ki kân mê hiăng mơhno tối um méa, túa cheăng dêi “ngế ki râng on:- pôa Nguyễn Phú Trọng - Kăn xiâm pơkuâ hnê ngăn. Ƀă tuăn mơno dêi pôa kô pơtối cho ivá ki ó rơdêi ăm tơdroăng tơpui kâ xiâm dêi Việt Nam tơkâ luâ mâu tơdroăng ki pơloăng mơnúa, ôh tá ton tơrôu drêng pa ngiâ ai hên tơdroăng pá peap tung plâi tơnêi ai hên tơdroăng ki ta hâi ‘nâi hdrối tiah nôkố.