Tơbleăng dêi Khu râ kăn pơkuâ cheăng Đảng kong pơlê ƀă Vi ƀan hnê ngăn kong pơlê Kon Tum ăm hlo, Kon Tum ai tâi tâng ƀăng deăng pêi chiâk deăng lối 902.000 ha, ki tơtrŏng má môi ai troh vâ chê 170.000 ha tơnêi pêt kong tá hâi ai kong. Kong pơlê mơnhên tung pêt mơjiâng tơmeăm pêi lo ing chiâk deăng mơnhông mơdêk cheăng kâ loăng pơkeăng cho loăng pêt lo liăn.

Nôkố lâp kong pơlê ai lối 6.800 ha loăng pơkeăng, tung mê, ƀăng tơnêi pêt Sâm Ngọc Linh cho lối 1.700 ha. Tung tơdroăng mơnhông mơdêk, kơvâ cheăng kâ ‘na kong dế trâm hên pá puât, môi tơdroăng tơdroăng pơ’lêh xiâm kối xúa kong; tá hâi ai pơkâ ăm xúa kong ki rak vế loăng pơlái kong kế ƀă kong tât khía vâ mơnhông mơdêk cheăng kâ pá xôp kong; troăng hơlâ tŏng kum mơnhông mơdêk pêt kong tá hâi tơxâng pơkâ nôkố ƀă hía hé.

Tiô pôa Lê Minh Hoan, Ngế xiâm tối kal pơtối pêi pro kơtăng, khŏm pêi tiô ví pơtê lôi tơdế hía roh tơ’lêi mơnhông mơdêk pêt mơjiâng tơmeăm ing chiâk deăng, pêt kong, laga thế tơdjêp ki kơnâ pêt mơjiâng tơmeăm ƀă ki kơnâ uâ mơdiê, tơdroăng tê mơdró, kơchơ mơdró. Ngế xiâm xuân mơnhên, Khu xiâm pơkuâ ‘na pêi chiâk deăng ƀă mơnhông thôn pơlê kô pơtối tơrŭm, tŏng kum kong pơlê Kon Tum tung tơbleăng, kơbông krếo, mơhnhôk mơ’no liăn cheăng tung kơvâ pêi chiâk deăng dêi kong pơlê tung la ngiâ.