Leh tơbâ 92 hơnăm Hâi mơjiâng Đoân Droh rơtăm Kŏng sản Hồ Chí Minh hâi lơ 24/3, Ngế xiâm pơkuâ Kŏng an, Kăn hnê ngăn tíu xiâm Đoân Droh rơtăm hiăng ai rôh tơpui tơno ƀă đoân viên droh rơtăm Kŏng an kuăn pơlê. A rôh tơpui tơno, pôa Tô Lâm, Ngế xiâm ngăn kŏng an prế pôa Bùi Quang Huy, Kăn hnê ngăn má môi Tíu xiâm Đoân Droh rơtăm Kŏng sản Hồ Chí Minh hiăng tơmâng ƀă tiâ mâu tơdroăng kơ-êng châ mâu đoân viên, droh rơtăm kŏng an tối mê cho: Tơdroăng cheăng pơ’lêh kơxô̆ nôkố; luât pơkâ ăm mâu lêng Kŏng an cheăm; tơdroăng tơdjâk troh kơjo kum mâu droh rơtăm cho mâu ngé ai hoăng cheăng tung Kŏng an kuăn pơlê vâ châ hriâm cheăng pêi, tối tơbleăng pêi pro klêi lo pơtê.

Pôa Tô Lâm tối tâng Khu xiâm Kŏng an, Đoân Droh rơtăm Kŏng an kuăn pơlê ôh tá tơbleăng pêi, xúa pơ’lêh kơxô̆ mê kô  xơpá tung pêi tơdroăng cheăng. ‘Na Kăn hnê ngăn Má môi tíu xiâm Đoân Bùi Quang Huy tối ăm ‘nâi, nôkố Tíu xiâm Đoân dế xúa pơ’lêh kơxô̆ a mâu râ kăn ƀô̆ Đoân vâ ai tơdroăng chêh ‘măn tung kơmăi, tơdroăng tŏng kum, veăng kum mâu vâi pú lêng pêi hnoăng cheăng drêng lo pơtê.