Tơbleăng ăm khu chêh hlá tơbeăng ăm ‘nâi hneăng hôp rôh má 12 Vi ƀan Tơrŭm cheăng Việt Nam – Nhuk hiăng châ tơkŭm po a Tokyo, Nhuk, a hâi lơ 7/8/2024. Péa pâ phiu ro tơdroăng vêh pơxiâm po Vi ƀan Tơrŭm cheăng Việt Nam – Nhuk klêi kơ’nâi 5 hơnăm pơtê xua pơreăng kân Covid-19.

Kố cho hneăng hôp ki apoăng châ tơkŭm po klêi kơ’nâi péa tơnêi têa thăm mơdêk tơrŭm cheăng tung la ngiâ tŭm têk xua hơniâp lĕm ƀă kro mơdrŏng a châu Á ƀă tung lâp plâi tơnêi, mơhno khŏm mơ-eăm dêi kăn pơkuâ Chin phuh, mâu khu xiâm, kơvâ cheăng péa tơnêi têa tung tơdroăng ki mơdêk tơrŭm tơroâ tơrŭm cheăng Việt Nam - Nhuk mơnhông rơdêi, ai pơxúa, tŭm têk tá ki rơkê plĕng, tơxâng ƀă troăng ngăn dêi tơrŭm cheăng nếo.