Tơdế khế 2/2023, po rơdâ tơdroăng ki séa ngăn sap ing rup rơxế chơ 21 rơno  loăng a kơpong Hngêi kơmăi on tơhrik Đak Pi Hao II (tơkoh kĭng ƀă tơring Ia Pa), khu ki ai tơdjâk troh tơring Kông Chro, kong pơlê Gia Lai châ hlo rôh ko ‘nhiê 7 to xiâm loăng kong a kơpong 780 kong xua Kŏng ti pêi cheăng tiô rơnó môi tung pêt kong Ia Pa rak ngăn. Pơtối mê, kơ koan ki ai tơdjâk troh châ hlo rôh ko ‘nhiê kong a kơpong 792 ối tung kơpong rak ngăn dêi Kŏng ti pêi cheăng tiô rơnó môi tung khu pêt kong Kông Hde.

A tíu ki kố, lối hrĭng to loăng tróu, căm xe tro uâ kơdong, ki hên kơxô̆ loăng kố hiăng châ toi lo ing kong. Tối ‘na tơdroăng ki hrá hlo, mơdât tơdroăng ko ‘nhiê kong, pôa Lê Văn Thủy – Kăn pơkuâ Kŏng ti pêi cheăng tiô rơnó Kông Hde tối ai tơdroăng ki ôh tá vâ hmâng:

“Pơkâ kơtăng nhên ăm kăn ƀô̆ cho ai tơdroăng ki klâi ‘lo athế tối tơbleăng ăm kăn pơkuâ kŏng ti vâ pơkâ tơleăng ƀă tối tơbleăng ăm râ kơpêng. La ai drêng ‘nâ, kăn ƀô̆, kŏng nhân viên pơtê mê kuăn pơlê akố lăm xo loăng pro hngêi mê cho tơdroăng ki ôh tá vâ tơmâng”.

Tơdroăng ki kong tro vâi ko ‘nhiê xuân hmâ hlo a hên tơring cheăm ki ê dêi kong pơlê Gia Lai, môi tiah Kƀang, Čư̆ Prông, Čư̆ Sê ƀă hên ki ê. Mơ’nui khế 2/2023, khu ki ai tơdjâk troh tơring Kƀang lăm séa ngăn, châ hlo a kơpong 114, kơpong kong xua Kŏng ti pêi cheăng tiô rơnó môi tung khu pêt kong Sơ Pai rak ngăn ai 16 to xiâm loăng kong rơdâ sap ing 40cm – 90cm tro uâ kơtong.

Pôa Nguyễn Văn Hợi – Kăn pơkuâ Kŏng ti pêi cheăng tiô rơnó môi tung khu pêt kong Sơ Pai, tơring Kƀang tối:

“Hnoăng cheăng rak ngăn, rak vế kong mâu hơnăm a chê kố trâm hên xơpá. Khu ki ai tơdjâk troh ‘na rak ngăn kong hmâ tối xơpá tăng tŭm mơngế pêi. Kuăn pơlê rơhêng vâ ko muih mâu ƀăng chiâk dêi kŏng ti rak ngăn, nôkố cho kong ki ối kŭn. Kuăn pơlê ko muih mot tung ƀăng tơnêi kong, pro pá ăm kŏng ti, ai mâu loăng ki kơnâ mê vâi xuân ối uâ kơtong vâ pro tíu ki ôh tá tơniăn”.

Malối, apoăng khế 3/2023, khu ki ai tơdjâk troh Kŏng an kong pơlê Kon Tum hiăng châ hlo hên loăng ki vâi uâ ôh tá tro luât a tíu ki ‘măn prêi a kĭng têa kroăng Đăk Pxi, ối tung cheăm Đăk Pxi, tơring Đăk Hà. Tíu ki vâi hrik xo prêi, hmốu kố cho dêi Kŏng ti pêi cheăng tiô rơnó 87. Tung kơxô̆ mâu loăng ki châ khu Kŏng an hlo kố ai péa pâ ‘na mâ, 4 kơhôp loăng, 11 to loăng ki tơvó nếo uâ ƀă 5 to loăng ki hiăng tâm ton hâi tung têa.

Tâi tâng mâu loăng ki kố pơrá ai ki xŏn ƀă ki rơdâ kân. Vâ kơtoâ khu ki ai tơdjâk mê khu ki tong uâ loăng kố vâi hiăng kơtoâ loăng tiô túa ki kơđu prêi a pêng. Laga, ai mâu loăng ki nếo châ uâ sap ing kong khu ki tong ăm hlo a tíu ki ‘măn prêi kơ xua tá hâi teăm kơtoâ.

Ki rơhêng vâ tối cho tíu ki ‘măn prêi kơtoâ loăng ki ôh tá tro luât bu kơtăn ing tíu pêi cheăng Vi ƀan hnê ngăn cheăm dâng 1km la khu kăn pơkuâ cheăm ôh tá ‘nâi ôh. Pôa Trần Phước Tuấn, Kăn hnê ngăn Vi ƀan cheăm Đăk Pxi tối nhên: hdrối rôh ki khu ai tơdjâk troh Kŏng an châ hlo tíu kơtoâ loăng ôh tá tro luât, khu kăn pơkuâ cheăm hmâ tơkŭm lăm pơtrui ngăn, tăng rup ƀă hnoăng cheăng rak ngăn kong hlo tơniăn ôh tá hlo ai tơdroăng klâi:

“Cheăm xuân hiăng mơjiâng mâu khu ki ai tơdjâk troh hmâ lăm pơtrui ngăn, tăng rup rak ngăn kong xuân môi tiah mơjiâng 2 tíu gâk a troăng ki xiâm cho troăng ki lăm ngi kong pơlê 677 ƀă troăng ví. Pơla hdrối nah mê hnoăng cheăng rak ngăn kong hiăng hlo chía tơniăn khât, mâu kong ki ối tung kơpong cheăm kố tơniăn, ôh tá ai tơdroăng klâi xía vâ”.

Pakĭng kơxô̆ loăng ki kố khu ki ai tơdjâk troh ối châ hlo tung tíu ki ‘măn prê  dêi Kŏng ti pêi cheăng tiô rơnó 87 a têa kroăng Đăk Pxi, ối tung cheăm Đăk Pxi, tơring Đăk Hà, ối ai loăng ki kân châ hlo tung ƀăng deăng kơxu kơtăn mê dâng 300m, ƀă 2 tíu ki vâi tơkŭm ‘măn loăng. A tíu ki tơkŭm ‘măn loăng má môi ai tâi tâng 7 kơhôp loăng ki kân.

A tíu tơkŭm ‘măn loăng ki má péa ai 4 kơhôp loăng ki kân, kŭn phá ra phá dêi rơpó. Tiô mâu tơdroăng ăm ‘nâi, kơxô̆ loăng tung ƀăng deăng kơxu cho loăng ki khu ‘mêi pơto lo ing tíu ki kơtoâ loăng ôh tá tro luât tung tíu ki ‘măn prê tíu ki hrik xo prêi dêi Kŏng ti pêi cheăng tiô rơnó 87 a kroăng Đăk Pxi.

Drêng tối troh kơxô̆ loăng ki vâi uâ xo ôh tá tro luât kố khu ki ai tơdjâk troh hiăng rup môi ngế kăn pơkuâ dêi Khu xiâm rak ngăn loăng pơlái kuăn kiâ kong kong pơlê Kon Tum xuân bu tối troh kơxô̆ loăng tung mê ai 6 kơhôp, 11 kơlêa loăng ki nếo uâ ƀă 5 loăng ki hiăng tâm ton hâi tung têa a tíu ki ‘măn prêi mê ối tá tâng tối troh kơxô̆ loăng ki khu ki kếo, uâ kơtoâ tung ƀăng deăng kơxu.

Ngế ki kố xuân ăm ‘nâi nôkố tơdroăng kố dế châ khu kŏng an pơtối séa ngăn vâ pêi pro nhên, peăng khu ki ai tơdjâk troh bu ai hnoăng tơrŭm mê ôh tá ai tơdroăng ki tối tơbleăng nhên ‘na kơxô̆ loăng ki châ rup xo kố.

Po rơdâ séa ngăn, khu ki ai tơdjâk troh kong pơlê Kon Tum apoăng hiăng châ hlo tung kơpong 327, cheăm Đăk Pxi ai 22 to loăng tro uâ kơtong. Laga, tá hâi mơnhên kơxô̆ loăng ki kố tro uâ kơdong tung kong ƀă kơxô̆ loăng ki kơtoâ tung tíu ‘măn prê ai tơdjâk troh dêi rơpó há lơ ôh. Tơdroăng kố dế châ khu ki ai tơdjâk troh kong pơlê Kon Tum pơtối séa ngăn vâ ‘nâi nhên.