Hneăng hơnăm 2020 – 2025, Đảng ƀô̆ Vi ƀan kong pơlê Dak Lak hiăng pơkuâ, hnê mơhno tâi tâng tiô troăng ‘’nhên mơngế, nhên tơdroăng cheăng, nhên tơdroăng châ tơƀrê’’, mơjiâng tơdroăng ki pơhlêh nhên tung mâu kơvâ cheăng kâ, khôi túa lĕm, pơlê pơla, gâk kring tơnêi têa – Kring tơniăn. Kơlo tơtêk GRDP tơdâng châ 6,24%/hơnăm; kơmăi kơmok uâ mơdiê, mơjiâng pro kế tơmeăm ƀă on tơhrik ki vêh pro chiâng tíu ki eăng; ôm hyô pro tơniăn ó rơdêi; pêi lo liăn tê ngi kong têa ê tâk tơdâng 11,2%/hơnăm.

Hngêi trăng, troăng klông kơpong, kơpong hngêi kơmăi kơmok châ kêi đeăng, mơhnhôk hên tơdroăng tơkêa bro kân, po troăng mơnhông nếo.

Mot a hneăng cheăng hơnăm 2025 – 2030, Đảng ƀô̆ Vi ƀan kong pơlê Dak Lak châ pơkâ tơtêk GRDP tơdâng sap ing 11,5/hơnăm tơngi klêng; pêi lo liăn tơdâng ko mơngế châ 160 rơtuh liăn/hơnăm; tâi tâng ki kơnâ tê tơmeăm ngi kong têa ê châ lối 13 rơtal dollars; mơhnhôk 43 rơtuh roh tơmối ƀă pêi lo liăn dâng 97.150 rơtal liăn; kơdroh rơpŏng kơtiê tơdâng 2%/hơnăm, krê kơpong kuăn pơlê hdroâng kuăn ngo kơdroh 3%/hơnăm.

Ki xiâm mơnhông mơdêk kơmăi kơmok, pêi chiâk deăng xúa kŏng ngê̆ rơxông nếo, ôm hyô ƀă cheăng kâ têa kơxĭ; tơrŭm ƀă pơhlêh ó rơdêi tíu mơ’no liăn cheăng, mơdêk khoa hok kŏng ngê̆, pơhlêh nếo tơmiêt pêi rơkê, pơhlêh xúa kŏng ngê̆ ƀă mơnhông mơngế pêi cheăng ki dâi lĕm.

Pôa Nguyễn Đình Trung, Kăn cheăng tung Khu xiâm Đảng, Kăn pơkuâ hnê ngăn cheăng Đảng kong pơlê Dak Lak tối nhên, Hneăng hôp roh kố kô pro xiâm kối ăm môi hneăng mơnhông mơdêk nếo, mơnhên hnoăng djâ troăng ahdrối dêi Đảng ƀô̆ Vi ƀan kong pơlê tiô troăng pêi pro tơdroăng pói vâ kro mơdrŏng ó rơdêi dêi Dak Lak.

‘’Đảng ủy Vi ƀan kong pơlê kal thế tơkŭm po pêi pro kơtăng mâu troăng hơlâ dêi Tơnêi têa ƀă pêi tiô mâu pơkâ hnoăng cheăng troăng pêi tiô Tơdroăng pơkâ dêi Tĭnh ủy vâ pơtối pêi pro tơdâng tơ’mô, tâi tâng ƀă châ tơƀrê hên, ki má lối cho tơniăn pơkâ tơtêk 8% tơngi klêng tung hơnăm 2025, mơjiâng xiâm kối vâ châ pơkâ tơtêk 2 kơxô̆ tung hneăng la ngiâ. Mơdêk mâu tơdroăng mơhnhôk mơ’no liăn cheăng, pơtối pêi pro mâu troăng kơtăng vâ mơdêk tơdroăng mơ’no liăn cheăng tơnêi têa, ki rơhêng vâ tối cho mâu tơmeăm tơdroăng kal ki xiâm. Teăm tơdrêng tah lôi pá puât mơjiâng ivá mơnhông cheăng kâ – rêh ối pơlê pơla tung hneăng la ngiâ’’.

Đảng ƀô̆ Vi ƀan kong pơlê Dak Lak mơnhên pơkâ tâi tâng tung hneăng nếo 2025 – 2030 cho: Mơdêk ivá pơkuâ hnê mơhno, ivá tơplâ dêi Đảng ƀô̆; tơrŭm môi tuăn, tơdjuôm ivá, môi hiâm mơno pêi pro ƀlêi trâng pơkâ hnoăng cheăng troh hơnăm 2030. Mơdêk pơhlêh pro mơ-éa, pơhlêh ó rơdêi tíu mơ’no liăn cheăng tê mơdró, mơdêk cheăng kâ krê mơnhông mơdêk, mơdêk ki dâi lĕm mơngế pêi cheăng; thăm pơkuâ loăng pơlái kong kế ƀă rak vế kong prâi; mơnhông ó rơdêi khoa hok – kŏng ngê̆, pơhlêh nếo tơmiêt pêi rơkê; tơkŭm mơnhông cheăng kâ ƀă pơhlêh xúa kŏng ngê̆, pơhlêh ngiât lĕm, kum mơjiâng kong pơlê Dak Lak tơniăn, mơnhông mơdêk, kro mơdrŏng lĕm, rơkê, khôi túa lĕm, krá tơniăn loi tơngah rơtế tơnêi têa mot tung chal nếo – chal thế xông mơ-eăm dêi hdroâng mơngế Việt Nam’’.