Kơxê lơ 5/2, a Hà Nội, Khu tơrŭm cheăng dêi Tíu xiâm Đảng tơnêi têa tơrŭm ƀă Hok viê̆n Chĭnh trĭ Kuô̆k ya Hồ Chí Minh pơxiâm po lâm hriâm tơ’nôm ‘na tơdroăng nếo ‘nâi ƀă mâu ngế  ki hbrâ vâ mot cheăng tung Khu kăn xiâm Đảng hneăng 13. Tối tơbleăng a hâi leh pơxiâm hriâm tơ’nôm, pôa Võ Văn Thưởng - Ngế cheăng tung khu xiâm kal kí, kăn hnê ngăn tíu xiâm Đảng tối, Đảng ‘nâi nhên, kăn ƀô̆ cho mơngế ki pơkâ tơdroăng cheăng pêi tơƀrê lơ ôh dêi Kăch măng.

Mơjiâng khu kăn ƀô̆, malối cho kăn ƀô̆ ki kân cho hnoăng cheăng pêi ki kal má môi, cho tơdroăng cheăng ki kal dêi Đảng, thế châ pêi đi đo, nhoăm mơnê, tro khoa hok, nhên khât ƀă hlối tơƀrê. ‘No mơjiâng khu  kăn ƀô̆ cho mâu ngế ki djâ troăng a hdrối ăm ‘na mơnhông cheăng kâ ton xŏn, krá tơniăn. Xua mê, Lâm hnê tơ’nôm châ po tro tiô tơdroăng ki nếo ƀă mâu ngế hbrâ vâ cheăng tung khu kăn xiâm Đảng hneăng 13 rôh kố ai hên tơdroăng pơ’lêh nếo ‘na tơdroăng kal, tơdroăng tơkŭm po lâm hriâm.

Malối cho tơdroăng rah xo 29 tơdroăng pơkâ tung hên tơdroăng ki kal rơtế ƀă mâu tơdroăng ki kal, ki xiâm tung chêh tối dêi hneăng hôp tung lâp tơnêi têa rôh má 13 dêi Đảng, mâu pơkâ hneăng hôp xiâm tơnêi têa hneăng 13 ‘na mơjiâng Đảng ƀă tơnêi têa, ‘na mơnhông cheăng kâ, rêh ối, mơhno túa lĕm tro, kuăn mơngế Việt Nam, ‘na rak tơniăn, cheăng lêng ƀă tơpui kâ, ‘na khoa hok, pơkuâ rak ngăn  tung hnoăng cheăng nếo nôkố.