Hâi lơ 8/6, klêi kơ’nâi Leh tơdah păng ‘nâng, a Tíu pêi cheăng Chin phuh, pôa Lê Minh Hưng, Ngế pro xiâm hnê ngăn Chin phuh ƀă pôa Anutin Charnvirakul, Ngế pro xiâm hnê ngăn kong têa Siam hiăng tơkŭm po tơpui tơno. Péa Ngế pro xiâm hnê ngăn tơnêi têa tối môi tuăn tơdroăng ki mơnhông ó rơdêi tơrŭm Việt Nam – Siam tung 50 hơnăm hiăng hluâ sap ing mơjiâng tơpui kâ a hơnăm 1976; mơnhên tơrŭm cheăng pơla péa pâ nôkố dế ối a hneăng mơnhông lĕm má môi sap ing hdrối nah troh nôkố, ƀă tơdroăng ki xiâm cho loi tơngah kal kí krá tơniăn, tơrŭm cheăng kâ ƀeăn ƀĕng ƀă trâm mâ tơpui tơno kuăn pơlê rế tơrŭm krá.

Tung kơvâ cheăng kâ, péa kăn pơkuâ môi tuăn pêi pro châ tơƀrê Troăng pêi cheăng ton xŏn ‘’Pái tơdjêp’’; mơdêk tơdjêp troăng klông, logistics, tơƀai kơneăng ƀă ôm hyô; hriăn plĕng mơnhông mơdêk mâu troăng pơto tơmeăm troăng prôk chêng, troăng têa kơxĭ tơdjêp péa tơnêi têa ƀă kơpong kroăng Mekong; mơnhông châ tơƀrê troăng pêi cheăng Vi ƀan tơrŭm Tê mơdró Việt Nam – Siam; kơdroh mâu tơdroăng ki mơdât tê mơdró, pro tơ’lêi hlâu ăm tơmeăm châ achê kơchơ mơdró dêi pó; mơ-eăm rĕng châ pơkâ pêi lo liăn tê mơdró 25 rơtal dollars ƀă tơmiât troh 50 rơtal dollars tiô troăng tơdâng tơ’mô, krá tơniăn.

Péa Ngế pro xiâm hnê ngăn tơnêi têa mơnhên khŏm mơ-eăm pêi pro châ tơƀrê mâu tơdroăng châ môi tuăn, djâ tơrŭm Khu tơrŭm cheăng ton xŏn tâi tâng Việt Nam – Siam mơnhông rế hía rế trâu hơngế, păng ‘nâng ƀă châ tơƀrê, veăng gum hên ăm hơniâp lĕm, tơniăn, tơrŭm ƀă mơnhông a kơpong.