Kơxo lơ 18/5, Khu xiâm ngăn Khoa hok ƀă Kong ngê̆ tơkŭm po Leh koh hâk Hâi Khoa hok, Kong ngê̆ ƀă Pơhlêh nếo tơmiât pêi rơkê Việt Nam ƀă Rôh hôp tơbleăng kong ngê̆ tung la ngiâ dó inâi “Khoa hok, kong ngê̆, pơhlêh nếo tơmiât pêi rơkê ƀă pơhlêh kơxô̆ - Ivá cheăng ki xiâm dêi túa pêi thăm mơnhông nếo”. Tơpui a rôh leh, pôa Lê Minh Hưng, Ngế pro xiâm hnê ngăn tơnêi têa tối nhên, Hâi Khoa hok, Kŏng ngê̆ ƀă pơhlêh nếo tơmiât pêi rơkê Việt Nam ôh tá xê to rôh ô eăng mâu ngế ki rơkê plĕng, khu ki hriăn ngăn ‘na khoa hok mê ối veăng ‘mâi mơnhông tơdroăng hâk tơngăm ‘na tuăn ngoâ rơkê Việt Nam.

Ngế pro xiâm hnê ngăn tơnêi tối nhên, khoa hok kŏng ngê̆, pơhlêh nếo tơmiât pêi rơkê ƀă pơhlêh kơxô̆ cho ivá ki kal vâ pêi pro châ tơdroăng púi rơhêng vâ mơnhông tơnêi têa; hlối pơkâ thế Khu xiâm ngăn Khoa hok ƀă Kong ngê̆ tơkŭm lêi tah mâu tơdroăng ki ối kreăng ‘na troăng hơlâ tŏng gum liăn ngân, kơjo ‘na liăn ngân ăm kong ngê̆ ki kal xiâm, kong ngê̆ tung la ngiâ ƀă khu mơdró kâ ‘na kong ngê̆.