Tung 5 hơnăm hiăng hluâ, hên khu pú hên, ngế krê dêi kơvâ Hnê hriâm hiăng châ: Kăn xiâm hnê ngăn tơnêi têa diâp Mê dái tŭm túa, diâp inâi Ngế hnê hriâm Kuăn pơlê, Ngế hnê hriâm ki ai ivá hnê rơkê ƀă hiâm mơno lĕm; Ngế pro xiâm hnê ngăn Chin phuh diâp hlá cơ tơ’noăng dêi Chin phuh, Ƀâng kheăn kơdeăn; Ngế xiâm pơkuâ Hnê hriâm ƀă Hnê mơjiâng tuăn ngôa rơkê diâp hlá cơ tơ’noăng dêi Khu xiâm ƀă Ƀâng kheăn kơdeăn...

Mơnhông mâu tơdroăng châ tơƀrê, tung la ngiâ, Khu xiâm hnê hriâm ƀă Hnê mơjiâng tuăn ngôa rơkê mơhnhôk ivá ó rơdêi tâi tâng dêi mâu râ Đảng, khu râ tung tơdroăng pêi pro tơdroăng tơ’noăng, kheăn kơdeăn. Tâi tâng kơvâ Hnê hriâm tơ’noăng pơhlêh nếo tơmiât pêi rơkê, mơdêk ki dâi lĕm hnê hriâm ƀă hnê mơjiâng tuăn ngôa rơkê, xing xoăng mơngế pêi cheăng ki rơkê, tơxâng pơkâ mơnhông tơnêi têa hneăng hơnăm 2025 – 2030, ing mê, pro ăm hâk vâ, mơhnhôk thái cô, mâu ngế hnê râ đăi hok, mơngế pêi cheăng, hok tro, sinh viên tơrŭm môi tuăn, tah lôi tơdroăng pá puât, mơ-eăm kêi đeăng lĕm tro hnoăng cheăng châ pơcháu.