Tung roh lăm pôu pêi cheăng a Việt Nam dêi Khu râ kăn Kuô̆k hô̆i kong têa Lếo, kơxê măng lơ 4/9, a pơlê kong kân Đà Nẵng, pôa Nguyễn Đức Hải, Kăn xiâm phŏ hnê ngăn Kuô̆k hô̆i Việt Nam pơkuâ roh tơpui tơno ƀă Kăn xiâm phŏ hnê ngăn Kuô̆k hô̆i kong têa Lếo Sổm - Mạt Phôn - Xể- Na. A roh trâm mâ tơpui tơno, Kăn xiâm phŏ hnê ngăn Kuô̆k hô̆i kong têa Lếo mơnhên, tơdroăng Kuô̆k hô̆i Lếo pơtroh khu râ kăn troh lăm pôu ƀă pêi cheăng a Việt Nam cho tơdroăng pêi pro môi tuăn tơrŭm cheăng pơla Kuô̆k hô̆i 2 tơnêi têa.

Pôa Nguyễn Đức Hải mơnhên tối, hơnăm 2024, Kuô̆k hô̆i Lếo pôu râng hnoăng cheăng Kăn xiâm hnê ngăn AIPA, tơkŭm po hneăng hôp AIPA-45, Việt Nam hbrâ tŏng kum Lếo pôu râng lĕm tro hnoăng cheăng Kăn xiâm hnê ngăn ASEAN/AIPA, ing mê gum mơdêk hnoăng cheăng, tíu cheăng dêi Lếo a kơpong ƀă lâp plâi tơnêi.