Pôa Nguyễn Kim Sơn, Ngế xiâm pơkuâ ngăn hnê hriâm ƀă hnê mơjiâng tuăn ngôa rơkê nếo ai roh pêi cheăng ƀă mâu kăn ƀô̆ xiâm dêi Hngêi trung Đại học Tây Nguyên. Klêi tơmâng tối tơbleăng ing peăng hngêi trung, pôa Nguyễn Kim Sơn, Ngế xiâm pơkuâ ngăn hnê  hriâm ƀă hnê mơjiâng tuăn ngôa rơkê pơkâ thế: Đại học Tây Nguyên kal thế xúa mâu tơmeăm ki ai hlâu vâ mơjiâng Tơdroăng tơkêa bro, Tơdroăng hnê hriâm tung la ngiâ. Hngêi trung kal tơtrŏng troh 2 khu kơvâ cheăng ki kong pơlê kal vâ cho mơnhông mơdêk kŏng ngê̆, kih thuât ƀă Khu tơdroăng cheăng ‘na khoa hok ƀă nhân văn, vâ pơxúa ăm tơdroăng rak ngăn pơlê pơla, pơkuâ ngăn pơlê pơla, loi tĭng, kuăn ngo, túa lĕm tro ăm Tây Nguyên.

Tơdrêng amê, Hngêi trung pơtối mơdêk tí tăng ‘nâi plĕng ‘na khoa hok; tơdroăng hnê hriâm dêi hngêi trung thế châ hnê tơƀrê vâ tơ’mot hên sinh viên mot hriâm, mơdêk kơxô̆ hok tro mot hriâm; ai troăng pơkâ pêi tung la ngiâ, troăng pêi ki nếo tung tơdroăng rah xo mot hriâm; ai troăng mơnhông khu cheăng ‘na khoa hok ing cử nhân ivá hriâm tơ’nôm vâ rế tâk kơxô̆ mơngế hriâm rơkê ki kân, vâ tơ’mot  hên mơngế ki rơkê mot cheăng.