Hneăng hôp kố hiăng séa ngăn, tơbleăng mâu tơdroăng pơkâ ki kal môi tiah: ‘mâi rơnêu, xing xoăng túa pơkâ mơ’no liăn cheăng tơdjuôm; tŏng kum pêt mơjiâng kế tơmeăm tung kơvâ pêi chiâk pêi deăng ối tung Tơdroăng pơkâ dêi Tơnêi têa ‘na kơdroh kơtiê krá ton; xut tah lôi mâu tơdroăng tơkêa ‘no liăn cheăng ka xo tơvêh tơnêi ƀă mâu tơdroăng tơkêa ‘no liăn cheăng kal hơ’lêh xúa pêt báu, tơnêi kong rak kơnhŏng têa chiâng tơdroăng xúa ki ê.

Tiô pôa Trần Dức Quận, Kăn pơkuâ hnê ngăn Đảng, Kăn hnê ngăn Hô̆i đong kong pơlê Lâm Đồng, kố cho mâu tơdroăng ki kal vâ kong pơlê pơtối pêi pro tơƀrê mâu hnoăng cheăng, mâu tơdroăng pơkâ mơ’no.

Xuân a rôh hôp, Hô̆i đong hnê ngăn kong pơlê Lâm Đồng séa ngăn hnoăng cheăng ‘na mâu ngế cheăng. Tiah mê, pôa Nguyễn Khắc Bình, Kăn pơkuâ hnê ngăn Đảng tơring, kăn hnê ngăn Hô̆i đong tơring Cát Tiên châ pôk pro kăn phŏ hnê ngăn Hô̆i đong kong pơlê Lâm Đồng hneăng 10, hneăng hơnăm 2021 – 2026. Pôa Nguyễn Ngọc Phúc, kăn pơkuâ hnê ngăn Đảng tơring Đức Trọng châ pôk pro kăn phŏ hnê ngăn Vi ƀan kong pơlê Lâm Đồng.