Tung mâu hnoăng veăng ‘no dêi pôa Nguyễn Phú Trọng - Kăn xiâm pơkuâ hnê ngăn Đảng ki tơƀrê tâ cho tơdroăng tơplâ mơdât kâ kơluâ, kâ tong, kâ hơré, kâ kơhveăm pro ôh tá tro tung mơjiâng tơdroăng pơkuâ mơngế, rak ngăn tơmeăm khoăng, séa ngăn arak luât pơkâ, tơdroăng pơkâ pêi pro tung Đảng ki hiăng ‘no hnoăng cheăng kân, tơleăng mơnhên, kơdo mơ-eăm tơkâ luâ pơloăng mơnúa, pá puât dêi tơnêi têa tung pơla mâu hơnăm mơnhông tơƀrê.Ngế chêh hlá tơbeăng Rơ’jíu Việt Nam ai ƀai chêh “Pôa Nguyễn Phú Trọng - Kăn xiâm pơkuâ hnê ngăn Đảng ƀă mâu hnoăng veăng ‘no ki kal tung hnoăng cheăng kăch măng dêi Đảng”.

“Hnoăng cheăng hbrâ mơdât kâ kơluâ” hiăng chiâng môi tơdroăng ki hmâ tung kuăn pơlê rêm rôh tối troh hnoăng cheăng hbrâ mơdât kâ kơluâ xua Đảng pin pơkâ ƀă pôa Nguyễn Phú Trọng - Kăn xiâm hnê ngăn Đảng hnê mơhno tơdrêng ing hneăng cheăng Hneăng hôp 11 troh nôkố.

Phŏ Yăo sư, Tiê̆n sih Lê Văn Cường, Phŏ viê̆n trưởng Viê̆n Mơjiâng Đảng, Học viện Chính trị Quốc gia Hồ Chí Minh ôh tá piu kơto têa mâ dêi pôa Nguyễn Phú Trọng - Kăn xiâm hnê ngăn Đảng tung mơgêi Rôh hôp Tơnêi têa 6 hneăng 11, hâi lơ 15 khế 10 hơnăm 2012. Mê cho kơto têa ki châi heăng má môi dêi ngế pơkuâ tơdroăng cheăng kal kí a ngiâ Đảng, a ngiâ kuăn pơlê drêng “Ôh tá iâ tung mê cho kăn ƀô̆, đảng viên” hiăng pơhlêh hiâm mơno. Kơto têa mâ mê hiăng chiâng ivá ki tơkŭm,bro chiâng ivá khŏm mơ-eăm dêi tâi tâng Đảng,tâi tâng kuăn pơlê tung rôh plâ mơdât kâ kơluâ liăn ngân:

“Drêng tơbleăng tơdroăng plâ mơdât kâ kơluâ mê pôa Nguyễn Phú Trọng, Kăn xiâm hnê ngăn Đảng hiăng lo têa mâ. Xua ti lâi? Xua Kăn xiâm hnê ngăn Đảng hiăng tối, pin plâ mơdât tơdroăng kâ kơluâ liăn ngân cho plâ mơdât dêi tơná, á hlo châi khât, ôh tá vâ plâ mơdât ƀă pó, cho mâu ngế dêi tơná,ôh tá vâ pơxâu phâk kơbố ôh. La vâi pó dêi tơná hiăng tro kâ kơluâ mê pin athế khŏm pro kơtăng pơxâu phâk, ôh tá ai kơpong ki lâi châ mơdât,  bô bối tâi tâng, maluâ ngế ki mê cho kơbố. Akố, tơdroăng ki ƀriê dêi Kăn xiâm pơkuâ hnê ngăn Đảng ai ivá tơdjâk bro pin pôi tá pơhlêh ihiâm mơno, pôi tá ton tơrôu, la pôi tá tơngôu, tơ’lêi hlâu luâ râ. Ai tiah mê ‘nôi nếo tơxâng ƀă hnoăng cheăng ki Đảng ƀă kuăn pơlê hiăng pơcháu”.

Pơtối tơdah pêi hnoăng cheăng “Kăn xiâm pơkuâ hnê ngăn” – Ngế xiâm hnê mơhno, Kăn xiâm pơkuâ hnê ngăn Đảng - pôa Nguyễn Phú Trọng hiăng rơtế ƀă kuăn pơlê pêi pro kơtăng khât tung tơdroăng tơplâ mơdât kâ kơluâ, kâ hơré, kâ kơhveăm ƀă hiâm mơno pôi tá pơrah, lôi  kơbố, ôh tá ai kơpong mơdât, ngế kăn râ a’ngêi lơ râ ki kŭn xuân bô bối tâi tâng. Bu krê to ing apoăng hneăng cheăng dêi Hneăng hôp 13 troh nôkố, Khu pơkuâ ngăn Tơnêi têa, Khu xiâm ngăn tơdroăng kal kí,Khu pơkuâ hnê ngăn Đảng hiăng pơxâu phak 44 khu tơrŭm cheăng Đảng ƀă 164 ngế đảng viên, tung mê ai 13 Ngế cheăng tung Khu pơkuâ ngăn Tơnêi têa, 17 ngế cheăng khu pơkuâ ngăn tơnêi têa hneăng hdrối ƀă 19 ngế râ tươ̆ng tung khu lêng kring vế; 19 ngế cheăng tung pơkuâ ngăn Tơnêi têa ƀă Ngế cheăng tung Khu xiâm kal kí pơtê cheăng. Ki khât kố môi tiah rơkong tơpui dêi pôa Nguyễn Phú Trọng, Kăn xiâm pơkuâ hnê ngăn Đảng- Maluâ “Châi heăng khât” la hiăng veăng gum ‘mâi mơnhông tơdroăng loi tơngah dêi kuăn pơlê ƀă tơdroăng pơkuâ dêi Đảng:

“Rôh plâ mơdât kâ kơluâ xua Đảng pin pơkuâ ối a ko cho pôa Nguyễn Phú Trọng - Kăn xiâm hnê ngăn Đảng châ pêi pro rơkê khât, ai troăng hơlâ. Pin hiăng khŏm mơ-eăm, kơhnâ, hiăng tơbleăng rôh plâ mơdât kâ kơluâ kố trâu hơngế tung tâi tâng kuăn pơlê. Á loi tiah kố, ƀă môi tiah nôkố rôh plâ mơdât kâ kơluâ Việt Nam xua tơdroăng pơkuâ dêi Đảng ôh tá chiâng bro pơhlêh xếo”.

Ôh ti xê to ƀă tơdroăng pêi pro tung tơdroăng ki ai khât, rôh plâ mơdât kâ kơluâ, kâ kơhveăm châ pôa Nguyễn Phú Trọng - Kăn xiâm pơkuâ hnê ngăn Đảng séa ngăn chiâng tơdroăng tơpui tối ing pơto pơtih“Khŏm mơ-eăm,kơhnâ khât tung tơplâ mơdât kâ kơluâ, veăng gum mơjiâng Đảng ƀă Tơnêi têa pin rế hía rế krúa, ó rơdêi”. Phŏ Yăo sư Tiê̆n sih Vũ Tình, ngế pơkuâ hngêi trung Đại học Khoa học Xã hội và Nhân văn, Đại học Quốc gia Pơlê kong kân Hồ Chí Minhhneăng hdrối tối nhên, kơxop hlá mơ-éa cho tơdroăng ki vâ ăm mâu ngế ki pêi hnoăng cheăng plâ mơdât kâ kơluâ:

“Mâu rơxông ối nếo kal athế hlêplĕng tơná athế hriâm tơ'nôm ivá cheăng, ivá kâi mơdât dêi tơná môi tiah lâi tung pơla mâu khu ‘mêi tí tăng hriăn vâ pro tơ’nhiê hnoăng cheăng plâ mơdât kâ kơluâ ƀă plâ mơdât mâu tơdroăng ôh tá tro. Ing kơxop hlá mơ-éa kố, mâu rơxông ối nếo kô hlê plĕng tâ hnoăng cheăng dêi tơná ƀă tơnêi têa, ƀă hdroâng mơngế, kal athế hriâm pât, rơnêu bro tơ’nôm ivá môi tiah lâi vâ tơxâng cho ngế dế ƀă kô cho ngế kăn xiâm pơkuâ tung la ngiâ dêi tơnêi têa”.

Xua tơdroăng pơkuâ hnê mơhno dêi pôa Nguyễn Phú Trọng - Kăn xiâm pơkuâ hnê ngăn Đảng, hnoăng cheăng plâ mơdât kâ kơluâ châ tơbleăng rơtế ƀă hnoăng cheăng kăn ƀô̆.Ƀă tơdroăng ki vâ pêi rế rak kơtăng pơxâu phak, rế mơhno nhên tơdroăng ki rơkê tro; ing hneăng cheăng dêi Hneăng hôp 11 troh nôkố, Đảng pin hiăng pơkâ nhên hên tơdroăng. Tung mê, tơdroăng ki thế pơtê cheăng châ pơkâ kơxô̆ 41 hâi lơ 3/11/2021 dêi Khu xiâm pơkuâ tơdroăng kal kí hneăng 13 cho môi tung mâu tơdroăng mơhno nhên, hlo tơƀrê tung tơkŭm krá rơdêi pơla hriâm tâp, pêi pro tiô tuăn tơmiât, túa rêh ối Hồ Chí Minh ƀă hnoăng cheăng mơjiâng, rơnêu pât cheăng Đảng.

Yăo sư, tiê̆n sih Tạ Ngọc Tấn, ngế cheăng tung tíu xiâm Đảng, kăn phŏ hnê ngăn Hô̆i đong lĭ luâ̆n Tơnêi têa hneăng hdrối tối nhên, tá hâi la lâi Đảng pin ai hlá mơ-éa tơdâng tơ’mô ƀă tŭm têk tơdjâk troh hnoăng cheăng kăn ƀô̆ môi tiah nôkố. Tơdroăng mê cho hnoăng cheăng pleăng dêi mơheăm chhá, hnoăng cheăng pôu râng dêi pôa Nguyễn Phú Trọng - Kăn xiâm pơkuâ hnê ngăn Đảng tung plâ vâ chê 3 hneăng:

“Tung mâu rơkong mơnhên tối mơgêi dêi mâu hneăng hôp mê mâu rơkong tối tơbleăng kal kí pơrá tối nhên tơdroăng ki ‘ro má môi xuân cho tơkŭm pêi pro. Vâ tơrŭm pêi pro tro mê athế ai môi troăng hơlâ pơkâ pêi klêi. Khu pơkuâ ngăn Tơnêi têa xua tơdroăng pơkuâ dêi pôa Nguyễn Phú Trọng - Kăn xiâm hnê ngăn Đảng hiăng pêi pro klêi mâu pơkâ, mâu troăng tŏng kum, mâu tơdroăng pơkâ thế tung tơdroăng cheăng dêi Đảng, ing môi tơdroăng pơkâ tơrŭm, túa pêi cheăng dêi rêm râ cheăng Đảng, troh mâu khu tơrŭm cheăng pêi, tơrŭm pơla kơ koan ƀă hên ki ê vâ pêi klêi trŏng tŏng kum tung tơdroăng cheăng dêi Đảng. Ƀă drêng pin ai môi khu tơrŭm tâi tâng tro, rơkê ƀă ai tŭm ivá mê drêng mê gá kô ai hnoăng kal khât tung thăm mơdêk hnoăng cheăng pơkuâ dêi Đảng, thăm mơdêk tơƀrê pơkuâ ƀă râng hnoăng pơkuâ dêi Đảng”.

Ƀă mâu tơdroăng veăng gum ăm hnoăng cheăng Kăch măng dêi Đảng, chiâng vâ tối tiah kố, pôa Nguyễn Phú Trọng - Kăn xiâm hnê ngăn Đảng cho kuăn mơngế kot mâ pơkâ tơleăng mâu tơdroăng pá puât, pơloăng mơnúa tung môi hneăng dêi tơnêi têa.

Pâ mơgêiƀai chêh ƀăng mâu rơkong tơpui tối ki ƀriê dêi Kăn xiâm pơkuâ hnê ngăn Đảng drêng ối rêh nah. Rêm rôh rơhêng vâ tơpui teăng rơkong tối tung hiâm mơno tơná, pôa hmâ vâ tối, pơkâ túa môi péa rơkong tơpui ki tro ‘ló khât dêi pôa Pa-ven Kốp-cha-gin tung ƀai ki ô eăng “Meăm thep hiăng châ chuih ‘răng tiah mê mê̆" dêi ngế chêh văn mơngế Liên Xô Nhi-cô-lai Ốs-xtrốp-xki. Mê xuân cho tơdroăng ki lĕm ki pôa Nguyễn Phú Trọng - Kăn xiâm pơkuâ hnê ngăn Đảng  hiăng hriâm ƀối tung plâ rơxông:

''Ki kơnía má môi dêi kuăn mơngế cho tơdroăng rêh ối ƀă túa rêh ối lĕm tro, xua kuăn mơngế bu rêh môi xôh tê. Athế rêh ối tiah lâi ăm pôi tá khéa hơ’nêng, pôi tá hêng hôu dêi tơná xua mâu hơnăm khế ki hiăng rêh bro mơhrê; vâ pôi tá kơxiâp xua mâu tơdroăng pêi ki ôh tá tro, ôh tá ‘ló, tro rêm ngế hêng hôu; vâ troh drêng kơtê i hiâm pin chiâng hâk tơngăm tiah kố: Tâi tâng rơxông pin, tâi tâng ivá pin, pin hiăng pleăng ăm hnoăng cheăng kơnía lĕm tro má môi a tơnêi - hnoăng cheăng plâ mơdât tơleăng lĕm hdroâng mơngế, tơleăng lĕm kuăn mơngế djâ vế tơdroăng ki hơniâp ro ăm kuăn pơlê!''