Hâi lơ 15/12, pôa Nguyễn Phú Trọng, Kăn xiâm pơkuâ hnê ngăn Đảng veăng hôp ƀă xông tơpui a roh pơxiâm po Hneăng hôp Đoân Droh rơtăm lâp tơnêi têa roh má XII, hneăng hơnăm 2022 – 2027. Pôa Nguyễn Phú Trọng pơkâ thế, mâu khu râ xiâm Đoân pơ’lêh nếo ƀă mơdêk tâ mê nếo tơdroăng dâi hôm, châ tơƀrê tơdroăng xiâm, troăng pêi cheăng dêi Đoân Droh rơtăm Kŏng san Hồ Chí Minh ƀă mâu khu tơrŭm droh rơtăm, droh rơtăm phô̆m xông kân Việt Nam, ngăn cho cho xiâm kối vâ mơdêk tơdroăng pêi cheăng Đoân, tơxâng tiô pơkâ dêi tơdroăng nếo, kum mơjiâng Đảng  ƀă khu cheăng kal kí, thăm rŭm môi tuăn tâi tâng kuăn pơlê ƀă gâk kring troăng xah hô̆i chuh ngiah.

Tung mê, xo tơdroăng kal vâ, pói vâ tơxâng, tơtro luât, tơrŭm krá tơniăn dêi droh rơtăm pro xiâm kối. Ki rơhêng vâ tối, tơmâng mơjiâng mơngế pêi cheăng hơnăm ối nếo, ki má lối cho mơngế pêi cheăng rơkê; pơkâ troăng prôk ăm droh rơtăm hriâm tâp ƀă hriâm xêh troh tá ah, mơ-eăm ƀă pơtâp tŭm tơdroăng, mơ-eăm chiâng pêi rơkê khoa hok ƀă kŏng ngê̆ ki rơkê, troăng pơkuâ tiô rơxông nếo.

Pakĭng mê, xuân kal thăm pêi pro rơdêi mâu tơdroăng pêi cheăng kăch măng, mơnhông mơdêk hnoăng djâ troăng ahdrối, tơmiât pêi rơkê dêi rơxông hơnăm ối nếo.